SAMOA, January 2 - Aso Tofi, 2 Ianuari 2025, 9.00am

Fa’afetai atu i le Fofoga o le Aso mo lo’u avanoa.

Ua tafa manino atamua o le taeao, o le taeao-afua, o le aso lua o le savaliga o lenei Tausaga Fou 2025. Tausaga Fou manuia i lo tatou nu’u.

Ua logologo le pualilo nai Ōlo pei o le tala i le fa’auluuluga o le aiga Satunumafono. Oute tu ai nei i si’ui o le faga ma ou tepa i le atumalama ina ua lafoia ataata o manū o le taeao. Ua tatou fesilafa’i i ele’ele sa ma fanuatapu o le Taua’ana, o le aiga e fa’amemelo i le latou tama, le Tama-aiga, le Tuimalealiifano. Ua oloula lenei taeao ina ua tatou fesilafa’i i pu’e o manū ae le’o mala. Ua tatou fesilafa’i i le laufatifati ma le tai alaala pei o le fetalaiga le Sili. Ua fotua’i manū o lenei tausaga ma e fa’amanū ai le suafa mamalu o lo tatou Atua Silisiliese.

Susū o lau susuga le Taitai o le Sauniga,

Afio lau Afioga le Ao Mamalu o le Malo o Samoa, lau Afioga le Tama’aiga, Tui A’ana Tuimalealiifano Vaaleto’a Sualauvi II.

Afio le tama o le itumalo, lau tofa Tologata Tile Lei’a.

Afifio le pa’ia o le auvala’aulia.

Mamalu maualuga i lo tatou nu’u; le afioaga o le Aiga Taua’ana ma le latou Tama. Le afifio o le Falefitu o le Atitagaloa. Mamalu aua le nofo-ituaiga i Galuefa, Tagata o le Vavau, Tula o Salogo ma Vae o le Nofoafia.

Ua mautu atu so outou matῡpalapala ma ua to atu manῡ mo le feagai ma le galuega. Tatou pi’iama fa’atasi i lena. Tau ina matou fa’apea atu, ia tumu pea le utu i a’upega o le galuega ma ia lē gaogao le fagunifo i le suāu’u o le fa’au’uga ma ia fai malōlōina pea le galuega i le alofa o le Atua.

O le a lē toe aloina le ogāsami ua mae’a ona o tatou folau ai. Ua uma ona paeulufanua ma paelago pa’ia o lenei taeao e le fofoga o le aso. Tau lava ina ou fa’atulou iai ma le ava tele ma le fa’aaloalo. Tulou le tulaga ae magalo le leo ou te fa’apea atu ai; Mālō le soifua, fa’amālō le lagi e mamā.

O le taeao lenei, o le taeao o le fa’afetai ma le agaga o le oli’oli ma le fiafia auā o le upu ale Tusi; “O le fa’amoemoe ua taunu’u o le lā’au lea o le soifua a’o le mana’o ua o’o e suamalie i le loto.” So’o se tasi e tigaina ma lailoa i se galuega faigata, a o’o ina mae’a le galuega na te lagona le agaga lea.

Ua le o toe po Malaē i le asō ma le mafua’aga ua tatou potopoto mai ai. Ua tatou fa’atasi mai i lenei taeao na atofa, i le aso lua lenei o le savaliga o lenei tausaga fou, sei tatou molimauina se tasi galuega tele ma le matagōfie sa afuliligi ma gāpātia ai le afio’aga ma le alalafaga.

Ua mae’a ona tapena e le ta’ita’i o le sauniga lo tatou va tapuia ma le Atua i le fa’afetai ma le fa’asani auā a na le seanoa lona Agaga e lē tau lau o le fa’amoemoe. Tau ia ina ou fa’apea atu, tatou ave se pati tele e fa’aopopo i Lona vi’iga i lenei taeao.

Lau afioga a le Taitaifono ma le komiti o le a’oga, fa’afetai ma fa’amālō sa’ili. Mālō le galulue ma le alofa i alo o lo tatou nu’u. Mālō le mataala i le atina’eina o a’oga mo fanau auā so’o se nu’u e popoto fanau e faigofie ona pulea ma atina’e.

E lē fa’agaloina la outou pitoamo mātua. E talitonu le loto sa tele lo outou sao i le galuega lea. O tupe, o taumafa, o le malosi ma le soifua na lagolagoina ai le fa’atinoina o lenei galuega tele. E tasi lava le lagona e ala ai ona fa’amalosi lo outou pa’ia o le alofa i fanau. E leai se matua e fia fa’aa’oga sona alo i se falea’oga e le ato’atoa ona lelei. E leai fo’i se tamaititi e fia a’oga i se falea’oga e lē malupuipuia ai latou. Fa’amālō pele o le fanau.

E fa’apea fo’i ona tāua lenei fale mo le galuega a le pulea’oga ma faia’oga. E manatu nisi e lē o le fale a’o le anofale. O le upu moni a lē lelei le fale e leai se isi e fia nofo ai. E lē ato’atoa fo’i le a’oa’oina o le fanau pe a fa’aletonu le falea’oga. Faia’oga le fale lena. O a mai le anofale? O outou e tali i le fesili lena. Tautuana le umi ona lelei o lenei fale matagofie ua saunia mo la outou galuega.

Le fanau, lo outou falea’oga lena. Tou te fia a’o’oga i se falea’oga manaia? Ia aua le tusitusia le tino o le fale. Va’ai lelei le falea’oga auā e leaga le a’o’oga o tamaiti o isi nu’u i fale lelei ae a’o’oga outou i falea’oga lē lelei.

Lau tōfā a le matua o faiva ma le aiga Salemalama, fa’amālō le limalima. Fa’afetai mo le galuega mae’a ma le matagofie. E leai se galuega e aunoa ma ni to’a ma faigata ae ua i’u manuia le feagai ma le galuega lea o lo outou lava papale. Ia maua pea le tomai ma le silafia mai le Atua mo nisi galuega tetele o lumana’i ai.

Fa’ata’i ma le leo o le a fo’i mai. A iai se lape o le tautalaga, lafoa’i i le ala lea. A tatala le filiali’i ma tu’uama le fua, ia folau i le lagi matafi. Aua ne’i afe se atua o le ala. Manuia lenei tausaga fou i fe’au ma galuega fa’alea’oa’oga aemaise o le fa’aaogaina o lenei galuega.

E fa’asilasila fa’aaloalo atu ai, ua tatala aloaia nei le tatou faleaoga fou mo le aoga tulagalua i Siufaga Falelatai nei.

SOIFUA.

Ata Pueina – Ministry of Education and Culture

January 16, 2025