SAMOA, May 7 - Ile Aso 7 o Me, 2024

Susu o lau susuga i le taitai o le sauniga: Reverend Mose Malaga (Faafeagaia o le Ekalesia Faapotopotoga Kerisiano i Samoa – Salailua)

Afifio Minisita o le Kapeneta, Afifio sui o Malo mai fafo.

Susu Faauluuluga o Matagaluega ma Faalapotopotoga a le Malo, Pisinisi ma Vaega Tumaoti

Afifio le Taitaifono ma sui o Fono Faavae o Itumalo o le motu i Savaii nei

Le paia ma le mamalu o le auvalaaulia

Afifio Samoa ua potopoto, o matuauu, o le au see papa ma tina uma o Samoa

O lea ua memea faalau’ie laulelei tapenaga o le taeao ma le aso. Ua mae’a ona momoli lapalapa o mālo i lo tatou va tapuia ma le Tapa’au Sili i le Lagi sa fofogaina e le Susuga ile Faafeagaiga. Faafetai tele i lau susuga ile faafeagaiga mo le faamalosia’u, ao se fafagu mo le mamalu ua afifio nei.

O paia ma mamalu ua malu tauee ai le afifio o Samoa ua potopoto, ma ua poto ai moli i Futiafu e tasi i lenei aso, o le vaa lava e faaufi gatā, ae o le i’a foi mai moana ua uma ona ‘aīsa. Tulouna ia Tulouna lava.

O le asō e taualuga ai le polokalame mo le Faamanatuina o le Aso Faapitoa mo Tina o Samoa 2024 e ala i le “Polokalame o le Fuataga o le Ie Samoa ma le Faaaliga o Siapo 2024”, i le Autu : “IA FUTIAFU E TASI MO AVANOA TUTUSA”.

O le Fuataga o le Ie Samoa ma le Faaaliga o Siapo, o se taumafaiga a le Malo o loo unaia ai le lalagaina o Measina a lo tatou atunuu, o le Ie Samoa ma le gaosiaina o le Siapo.

Ua silia ma le 30 tausaga talu ona faatinoina e tina ma tamaitai Samoa le lalagaina o le Ie Samoa peitai faatoa aloaia o se polokalame tuliloa i lalo o le Matagaluega o Tina ma Tamaitai, Atinae o Nuu, Afioaga ma Agafesootai ile tausaga e 2003 seia oo mai lava ile taimi lenei.

E le o toe faigofie ona unaia atinae a le Malo aemaise lava i lenei Measina ina ia mautinoa e mafai ona faaauauina ma e lelei atoatoa, ona ua tele o luitau ua feagai ai i nei ona po. O nisi o luitau e aofia ai le aveesea o le lagolago o le tele o Falelalaga na resitala ile Polokalame ma tuliloa e le Matagaluega o Tina ma Tamaitai ona ua tele tina matutua ua le gafatia ona toe lalagaina le ie Samoa i ona tosi faatulafonoina ile “Tulafono Faatonutonu o Mea Samoa Faa- Anamua (Ie Toga) 2013”.

Peitai, o le tatou ie Samoa, ua tulaga ese ai lava Samoa i saofaiga uma a le Itulagi ma le lalolagi, ona o lona tulaga maoae e le gata i le gaosiga, ae o lona faaaogaina – aua e amata mai lava i le pepe e oo i le tagata matua, e aoga iai le ie.

E lē faatuaoiina foi ni ie mo alii ma tamaitai, poo le tulaga o se tagata. O le faatinoga foi o lona lalagaina ma le gaosiga, o lea ua faisao uma iai aiga i ona itutino uma, e le gata i alii ae o tamaitai, seia oo lava i alo ma fanau, e tafa pe a lautele le tosi, fafaga pe a valavala le matā lālāga, ma tulituli matāgau le ufi a le tamaitai, e lepa i le foe ae mapu i le too, e tusa o le fua ua uma ona tapena ai lona lalagaina, seia mae’a ma matagofie mo le faaleleina.

O le faaaogaina foi o le Ie, ua le gata i le maualuga o faaaloaloga a le atunuu ma lona tumutumuga i maliu, saofai, faaipoipoga ma aso fanau, ae e pei lava o le satauro o Keriso, o le ie foi, ua toatele pagota ua ola ai. O vaega ia, ma o itu foi ia, na mafua ai ona avea le tatou Ie Samoa o se punaoa, ua talia ma amanaia aloaia e Malo Aufaatasi, e ala i le UNESCO ma lo tatou malo, o se punaoa ma se meafaitino anagata ma e ao ina puipuia mo le lumanai.

O le Ie Samoa foi, ua avea ma alagaoa i le toatele o tamaitai o le atunuu, e pei foi o i latou ua faamanuiana i lenei aso, iā latou tupe faameaalofa ua tapenaina e le tatou Malo. O nei lava tupe faameaalofa, e le o le tau lea o le ie, ae ua o se faailoga e tali atu ai lo outou gapatia ma le fitaituga, e unaia ma lagolago lenei polokalame a le Malo.

O le faamoemoe maualuga, ia gafataulima le lalagaina o le Ie Samoa, ma unaia malosi le lalagaina o le Ie numera tasi, numera lua ma le numera tolu, faatasi ai ma le gaosiga o siapo. O le ala lea ua le avea ai e le Malo a tatou ie, ae uma lava ona e toe susu lea ma oe e faaaoga i sou faalavelave pe faatau foi mo se seleni faaopoopo mo le gafataulimaina o fuafuaga a le aiga.

O le āfuaga lea o taumafaiga a le malo, e tauala atu ile Komiti Faufautua o le Ie Samoa ma le Matagaluega e faamalosia le unaia o lenei Polokalame o le “Fuataga o le Ie Samoa ma le Faaaliga o Siapo” i le 21 tausaga talu ai.

O le aoga o le ie i le tamaoaiga o aiga, Ekalesia ma afioaga, e le toe tau fesiligia. Ua maua taavale, fausia fale tioata, totogi pili o aoga a alo ma fanau, gafatia fuafuaga tau tupe a aiga i tupe e maua mai ia outou Ie Samoa.

Mo lenei Fuataga o ie Samoa ma Faaaliga o Siapo, e moni ai upu e fai i le lalagaina o lenei Measina “O lea ua faamau fausa” o galuega alofiaao o tina ma tamaitai aua ua ‘ae manuia le faatamasoaliiga ile limalimaina o ie o le malo sa outou gapatia ai.

Faamalo le se’e, faamalo le limalima. Sā ō, Sā ō Fa’alā ua lelei!. Ou te faafetaia ai le galuega mae’ae’a a matuauu ma le auseepapa o Falelalaga uma o le atunuu o loo lagolagoina pea lenei atinae taua.

Mo Tina uma o Samoa, ua tatou aga atu i le faamanatuina o lo outou Aso Sā Faapitoa.

Ia manatua pea la outou āūliga. O la outou tautua i soo se vaega, ma la outou lagolago, e pei ona tatou molimauina i lenei aso.

Ona ou faapea atu ai lea, ia manuia tele lo le taualugaina o le Polokalame o le Ie Samoa ma Siapo ma le Faamanatuina o le Aso faapitoa o Tina uma o Samoa mo le motu tele i Savaii nei. Ia saga faamalosia pea outou e faatino measili mo le viiga o le Atua, ae o le manuia mo tagata uma.

Soifua ma ia manuia.

Ata Pueina – Malo o Samoa (Leaosa Faaifo Faaifo)

Legal Disclaimer:

EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.