There were 1,681 press releases posted in the last 24 hours and 402,169 in the last 365 days.

Saunoaga Faapitoa mo le Sui o le Afioga i le Sui Palemia : Hon. Valasi Luāpitofanua To’ogamaga Tafito Selesele mo le Tatalaina o le 13 Aso o le Kerisimasi (Malumalu EFKS: VaiteleUta: 12 Tesema 2023)

SAMOA, December 13 - Lau Susuga i le Taitai o le Sauniga

Le paia o le nofoā faafeagaiga ua o tatou mafuta i lenei afiafi

Le mamalu mauāluga o le nofo-a-tofi o le Ekalesia EFKS i Vaitele Uta nei

Le paia o Samoa ua potopoto mai ona po na o’o seia paia ona fatutuloto

E  fa’apea foi le tapuaiga mau a si o tatou atunu’u o lo o faafogafoga mai i maota ma laoa.  

Ou te fa’atalofa atu.

O lea ua ite fanua a lalo, ma ua api le uli, aua ua toe o se aga ona o tatou faamanatuina lea o le Kerisimasi o lenei tausaga. O la tatou faafetai e momoli faatasi i lo tatou Atua, auā ana le seanoa lona alofa tunoa ma lana tausiga mamana i a Samoa, semanu e to i moana la tatou folauga. 

O le afiafi nei, o le a o tatou molimauina ai le amataga o le polokalame mo le 13 Aso o le Kerisimasi  a le Ekalesia EFKS  i Vaitele Uta nei.  Ou te manatu o le lona 26 ai lenei o tausaga talu ona fa’avae le 13 Aso o le Kerisimasi. Ma o se faamoemoe ua au-tausagā, ma ua lausilafia e si o tatou atunuu, e tamua ai pesepesega ma viiviiga mo le soifua mai o le Pepe o le Kerisimasi, lo tatou Alii Faaola, le Mesia na valoia.

Afai tatou te toe tepa i le po na fanau ai le Mesia e tusa ma le afioga a le Atua, na molimau i ai  Mataio ma le fomai o Luka, na  iloa e Makoi mai sasae le pupula fa’atāli’oli’o o le fetu, e uiga ese lona malamalama. Ona fa’anofoa lea o a latou  kamela, ma fa’ata’alise  atu, sei saili le mea ua fanau ai le Mesia, e feiloai  i ai.

O  le  aso lea  na liu  tino tagata ai le Upu, ma afio mai e mau  fa’atasi ma i tatou.  O ia o le Tama na valoia, e i  lona  ua le Mālō,   o le Toa malosi, o le Tupu o Tupu ma le Alii o le Filemu.

Ou te  taofi, o le agaga lea o lo o ta’ui ai  lenei  polokalame.  E  le taumate foi o le mafuaaga  tupito  lea e tinoū ma maelega ai lau susuga i le Faafeagaiga ma le Ekalesia e fa’aauau pea lenei polokalame i nei mau tausaga,  e  fa’amanatu ai le fa’ataūaina e le au Kerisiano o le malamalama moni o le Atua;  le aso na afio mai  ai le Atua i le lalolagi, e tineia le pogisa ma galuega leaga uma a le malo o le pouliuli.

Ou te fa’amauina ai  le  fa’afetai a le tatou  Malo i le Susuga i le Fa’afeagaiga o le Ekalesia, lau Susuga Muao Fagasua Su’a, fa’apea le matāpule o le Ekalesia i ona matafale uma. Famalo le taunapo i le talalelei, faafetai lo outou vilivilita’i  e  faaauau  lenei  faamoemoe. O le fa’amanatuga o le loto  fa’afetai  i le Atua, e lē  to’a  pe  mavae. Aisea?, auā o lō tatou tofi i le faaolataga, na  fa’amautū  i le afio  mai o Iesu  Keriso  i le Aso  Kerisimasi.

O viiga ma pesepesega mo le Atua, e sili ona leotele ma suamalie i lona finagalo,  auā  e pale le Silisiliese  i  ona  viiga. E molimau  i  ai  Tavita  i le Salamo  e  50, ‘ o lē  nate  faia le viiga ma taulaga,  o le ava lea i le Atua. O Samoa ma lona  Malo  e  faavae  i le Atua o Aperaamo, Isaasko ma Iakopo. O lo tatou  faavae papa lena, ma e sili  ona  leotele  i  luma o le nofoalii o le alofa  tunoa,  viiga e saunia  lelei, e tapuai  ai  i le Atua.

O le  toe upu, aua nei  mavae lo tatou  fiafia  i  lona malamalama. Ia  tu’uina  atu  i le Atua le viiga e pei ona  mua’i  lagiina e agelu  i le va o le lagi ma  le  lalolagi  i le po  na  fanau  ai  Iesu ma fa’apea, “O le viiga  i le Atua  i mea aupito  ā  luga  ma le manuia i   le lalolagi  i  tagata  ua  alofagia e ia”.

Ia  manuia le alofaiva o aufaipese  ua  togia  mo  lenei  fa’amoemoe. Ia  agalelei le Atua i le Susuga i le Tausi  Matagaluega, le nofo-a-tofi, ma le Ekalesia EFKS i  Vaitele  Uta  nei.  Ia  manuia  le  fa’afofoga  maimoa  mai a si o tatou   atunuu  i  lenei  afiafi.

Ou te  fiafia e fa’ailoa   atu  ua  tatalaina  nei le  Polokalame o le 13 Aso o le Kerisimasi.

Soifua ma ia manuia.