SAMOA, December 23 - 23 Tesema 2022

O le ā taoto pea ia fa’agalu e le fati, paia ma mamalu o lenei sauniga. Sūsū lau susuga i le Ta’ita’i o le Sauniga, lau susuga i le Tausi Matagaluega – Susuga Falefa Mae’e.

O le paia o Mulinuū, ma le mamalu o malaefono i Lalogafuafua

Aua le afio o le Tuiātua

Susu Seutatia

Susu le Toaono, Lufilufi ma le Saofaiga

Ou te talitonu, o lea lava ua lalagofaatasi lenei faamoemoe, ae tamua i le tatou faafetai ma le viiga i le Atua. Faamalo le soifua manuia.

O lea ua fa’atini foe mo le a’e o le ta folauga umi na amata mai ia Ianuari, seia oo mai i lenei aso, ua laolao foi le vasa nai Asuisui; ua toe o se aga ona o tatou fa’atofa atu lea i le 2022, ae fotua’i mai le tausaga fou, 2023. O loo tatou iai foi i le aga atu i le fa’amanatuina o le fanau mai o lo tatou fa’aola, le Alii ia o Keriso. Ae ua le tuua ai le taua o le fa’amoemoe o lenei aso, lea e le gata i le fa’amanatuina o le 60 tausaga o lo tatou Malo Tuto’atasi, ae o le amanaiaina ma le fa’atāuaina o le tetee atu i sauaga i totonu o Lufilufi nei.

E le toe taumatea le faigāta sa o tatou folau mai ai, a’o feagai le lalolagi ma le faama’i o le Koviti 19, o taua ma fevesiaiga o Mālo tetele o le lalolagi, o le siisi o le taugata o le soifuaga ma luitau o puipuiga ma le saogalēmu e le gata i lenei itulagi, ae o Samoa foi; fa’atasi ma le anoanoa’i o isi lu’itau o le soifuaga nei sa o tatou ui mai ai. Ae o le faafetai ma le viiga e le fa’amaualaloina i le Atua lo tatou matai sili, aua o ia o lo tatou Taula i faigata o lenei olaga; o ia lo tatou Puluvaga, o lo tatou Olo malosi, tatou te malu ai i ‘afa. O sia taimi itiiti, a’o tatou feagai ma vavao o le Koviti ma taumafaiga e tetee atu le fa’ama’i ae fa’asopolia tūiga o puipuiga mai i lenei fa’ama’i, na pei o se ata fa’a’emo, o le faigata sa o tatou asa mai ai, a o pūlea esea lo tatou Mālo, o lo tatou sa’olotoga, o o tatou tagatanu’u, o o tatou ‘ele’ele ma fanua, o tu ma aga a Samoa, e isi mālo tetele o le lalolagi, i faiga fa’akolone.

I le toe tepa la i tua, e manatua ai pea ma le loto fa’afetai, le agalelei o le Atua i o tatou tuaā ua lagomau mai i ti’asa, e aofia ai foi nisi o lenei alalafaga ma le Itumālo. O lo latou fa’autauta i le atamai, o le poto fetala’i ma le tōfa fa’aalualu mamao na fa’ameaalofaina mai e le Atua, na tupu ai lo latou fa’atuatua, e le i ni vaaiga na iloa atu e mata o le tino nei, ae o manuia sa o’oo’o i o latou lagona ma loto, i o latou sulu fa’aleagaga. E oo mai faiga fa’akolone, ua matua le Talalelei i Samoa – na afua ai foi ona faigofie le fa’amautūina o le talitonuga o o tatou tuaā i le Atua; ma maua ai pea le to’afilēmu, o le onosai ma le loto tetele, o le mau o le to’ovae, ‘oa le tōfa ma le fa’autaga, i le mautinoa, o lo latou fa’atuatua, e fiafia mai ai le Atua. Ina ua tapena la le fa’amanatuina o le atoaga o le 60 tausaga o lo tatou Malo Tutoatasi, na manatu le Kapeneta, ia aua nei galo i lenei fa’amanatuga o le 60 Tausaga o le tatou Malo Tutoatasi, “Ia folau ma le Fa’atuatua”. O le auau lea o le faamanatuga.

E ui e le o utuvā pea luitau tatou te fesagai i taimi uma, peitai o loo malu pea Samoa i le aao malosi o lo tatou Atua. E manatu, o le malutiaga foi lea, o loo lagomāluina ma fa’ato’ato’a ai fisaga o ni laufatia i Mulinuu ma Sepolataemo, tainane Lalogafu’afu’a. Ou te fa’amalo atu ai i le pule mamalu a alii ma faipule. Malo le fai o le faiva. Fa’afetai le saili malo.

E momoli atu le faafetai i lo tatou nuu ma le Ekalesia, i le tu’ufa’atasia o lenei polokalame, e lalagofaatasi ma le fa’amanatuina o le 60 Tausaga o lo tatou Tutoatasi. O le lagona maualuga lea o le Mālo, ia tatou oloolo pito va’a fa’atasi, aua e a le puna oe, ae a le faga a’u; o le tatou fa’afesaga’i ma lauluafesilafa’i, āleaga ma fetufaa’i, e manino ai foi lo tatou fealofani e tusa o le finagalo o le Alii o le Kerisimasi, ae taunuu ai o tatou fa’amoemoega uma mo le manuia o Samoa, i le tatou folauga ma le fa’atuatua. O le ki foi lea ou te manatu, e laveaina ai ma taofia sauaga i totonu o aiga.

E le o toe lilo, le fa’aauau pea ona sauāina tīna, tama’ita’i, fānau, o e matutua ma i latou e iai aafiaga tumau o le soifua, ia ma nisi foi tāma, aemaise lava i vaitaimi fa’apenei. Ua fa’atalaleleiina lo tatou nuu; ma e iai le taofiga, o le pule mamalu a alii ma faipule, fa’atasi ma le aufaigāluega totofi a le Atua ma tatou uma, e faaauau ona nutimea faatasi, e tofu sao i le tafiesea o sauaga i le tino, mafaufau, sauaga mataga, ma sauaga le mo’omia, i totonu o nu’u ma afioaga uma o Samoa.

Ua tatou iai i aso fiafia, ae mafai ona avea ma aso o fa’anoanoaga, pe a le fa’autauta. O le tatalo ia o tatou pea le agaga o le Kerisimasi, tatou te folau ai ma le faatuatua i le agai atu i le tausaga fou.

Ia afe mai  lea o se fa’amatalaga, ia manuia tele le fa’amoemoe o lau susuga  a le Tausi Matāgaluega ma lo tatou nuu. Ia manuia le tapuaiga a le tatou Nuu.

Ia manuia tele le Kerisimasi ma le Tausaga Fou.  

Soifua.

Legal Disclaimer:

EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.