SAMOA, May 11 - E MUAMUA ONA ‘OU FA’AFEILOA’I ATU I LE PAI’A MA LE MAMALU O LE TATOU ATUNU’U O LO’O FA’AFOFOGA MAI LENEI FA’ASALALAUGA I LENEI ASO. AFIO LE AFIOGA I LE AO MAMALU OLE MALO MA LE MASIOFO, AFIO LE AFIOGA O LE PALEMIA MA LE KAPENETA, FA’APEA FO’I VAEGA ESEESE O ITUTINO FA’AFETAU AGAI O LE MALO O SAMOA. MALO LAVA LE SOIFUA MA LE ONOSA’I I LAVASIGA I FEA’U MA TIUTE SA FEAGAI AI AUA LE TAUTUAINA O AIGA, NU’U MA EKALESIA.  

Ae o lenei fa’asalalauga e fa’apitoa mo le fa’amanatuina o le aso mo le Ola Lelei o La’au i le Lalolagi (International Day of Plant Health). O le fa’amoemoe lenei sa amata ona fa’amanatuina i le tausaga 2020, sa fa’atinoina ai le tele o polokalame e fa’alauiloa ai le taua tele o le puipuia ole ola lelei o laau ma ua atofaina ai e le Fa’alapotopotoga mo Meataumafa ma Fa’atoaga a Malo Aufatasi, po’o le FAO, le aso 12 o Me i tausaga taitasi e aloaia ai le fa’amamaluina lenei aso fa’apitoa o le ‘Ola Lelei o La’au i le Lalolagi’ (International Day of Plant Health).

E pei ona outou silafia ma tatou iloa uma, o la’au o le fa’avae lea o le ola o meaola uma i totonu o le lalolagi ma e maua mai ai le tele o a tatou meataumafa fa’apea le okesene o lo’o manavaina ina ia tatou maua pea le ola i aso uma. E lē gata i lea, o fefa’ataua’iga o lo’o fai nei i la’au ma oloa e maua mai i la’au aemaise mai i fua o fa’ato’aga, o lo’o maua mai ai tupe e fa’amoemoe iai le tele o isi atunu’u. O le mafua’aga lea o le agaga ta’atele lea e fa’apea, o la’au o le fa’amoemoega autu ma le taua lea mo le ola o le tagata ma ana atina’e aua e maua ai le mau i meataumafa, mea’ai paleni ma se olaga tamao’aiga.

Ua manino nei i le soifuaga i aso nei, o le ola lelei o la’au e le o se mea tatou te tu’ufau iai pe lē āno iai. E mafua lea ona o le taimi nei, ua atili fa’ateteleina le lamatia o la’au i fa’ama’i, manu ma meaola fa’alafuā, pe’a fa’atusatusa i aso ua mavae. O se fua aoaotetele e fa’apea e tusa ma le 40 pasene o la’au e toto mo meataumafa i le lalolagi e fa’atama’ia e fa’ama’i i tausaga ta’itasi.

O le tele o oloa fela’ua’i i va o atunu’u ma le femalagaa’i solo o tagata e asiasi ma faiga pisinisi i le lalolagi ua avea ma auala e sosolo fa’aafi ai le pepesi o fa’ama’i ua fa’atamai’a ai laa’u o le lotoifale o meataumafa ma fa’ato’aga fa’apea le si’osi’omaga.  O le mea lea e tatau ai ona tatou gaioi ma galulue vave ina ia puipui tatou.

O nisi fa’afitauli ua tula’i mai i le taimi nei, o suiga o le tau ua fa’atama’ia ai le si’osi’omaga ma a’afia ai le tele o isi meaola e iai lo latou aoga i le soifua o tagata ma le ola o meatoto.  Afai ‘ae fa’atama’ia e fa’ama’i ma lē toe mafai ona ola se itu’aiga la’au toto i luga o le foga’ele’ele ‘ae o se la’au e fa’amoemoe iai meataumafa, o lona uiga o le a tatou le toe maua lea meataumafa. O le fa’ata’ita’iga lata mai o le Talo Niue ma le Talo Manu’a na fa’atama’ia e le lega i le tausaga 1994.

E tele fa’ama’i ma manu ma meaola fa’alafua o la’au na sao mai i totonu o Samoa ‘ona o le tatou fa’atamala i aso ua mavae; e aofia ai;

•         le manu ‘ai niu;

•         fa’ama’i o fa’i e iai le lau sului ma le lau feti’iti’i;

•         sisi Aferika;

•         lega o le talo;

•         ma le tele o fa’ama’i o fuala’au faisua ma la’au taumafa mata.

Ua tele nei ni tausaga o galue malosi le tatou Matagaluega o Fa’ato’aga ma Faigafaiva ina ia puipuia Samoa mai le ulufale mai o fa’ama’i, manu ma meaola fa’alafua. O lo’o fa’avae lea galuega i le ausia o ta’iala ma tulafono mo le saunia o la’au e fa’amoemoe mo le fe’avea’iina fa’avā-o-malo. O nei ta’iala o lo’o fa’amalosia i lalo o le Feagaiga Fa’avāomalo mo le Puipuiga o La’au o le International Plant Protection Convention po’o le IPPC.

E taua tele lo tatou galulue fa’atasi e taofia le fa’aulufale mai o fa’ama’i, manu ma meaola fa’alafua ma lo latou sosolo atu i fanua fou. Aemaise i tatou ia e aofia ai le malo, le aufaifa’ato’aga ma isi e a’afia i le tau’a’aoina o la’au ma oloa e maua mai i la’au ina ia taunu’u i le fale’oloa po’o le maketi, e iai le ‘aufaipisinisi ma le ‘au la’uoloa. O le taunu’uga lelei e maua mai ai o le fa’asaoina lea o meataumafa ma tupe gau.

O se fa’amoemoega ua tino mai le fa’amaoniga lea o le Aso mo le Ola Lelei o La’au i le Lalolagi ina ia si’itia le silafia o le lautele o le tatou atunu’u i le taua o le ola lelei o la’au e pei ona fa’asilasila aloa’ia e le Fa’alapotopotoga mo Meataumafa ma Fa’atoaga a Malo Aufa’atasi o le Lalolagi, mo le tausaga 2020.

E iai ni polokalame ma fuafuaga o lo’o saunia mo le fa’alauteleina o le sini o le fa’amoemoe, e lē gata i isi atunu’u o le Pasefika ae fa’apea fo’i tatou i Samoa nei.  Oute vala’aulia i tatou uma tatou te auai i ia polokalame ma avea i tatou ma amepasa o lenei fe’au taua ina ia salalau atili atu lona taua i isi.

O lo’o taulamua le tatou Matagaluega o Fa’ato’aga ma Faigafaiva i lalo o le tagavai ‘puipui la’au, puipui le ola’ ma o lo’o talosaga atu tatou te galulue fa’atasi mo le ola lelei o la’au, puipui le tamao’aiga mai le ele’ele o lo’o fa’amoemoe iai aiga ma nu’u i tua, aemaise e maua ai tupe ma meataumafa.

O tatou uma e mafai ona tatou fesoasoani i le galuega. Tautuana ma i tatou uma: fa’aēteēte lou malaga mai atunu’u i fafo ma aumai laau po’o ni fatu la’au e toto e aunoa ma le silafia e le tatou Matagaluega o Fa’atoaga ma Faigafaiva, po’o le lē uia o auala o le tulafono.  Manatua e mafai ona molia ai ‘oe, ae o le mea e pito sili ona leaga, e mafai ona fa’aulufale mai ai fa’ama’i i totonu o le tatou atunu’u.

O le isi fa’aēteētega o le lafo mai lea i le meli o la’au po’o ni fatu laau e toto. E tatau lava ona logo le tatou Matagaluega o Fa’atoaga ma Faigafaiva mo se fautuaga aua tasi lea auala e mafai ona fa’aulufale mai ai fa’ama’i i totonu o si tatou atunu’u.

Ia manuia le fa’amanatuina o lenei aso o le Ola lelei o La’au i le Lalolagi!  Soifua ma ia Manuia!

Legal Disclaimer:

EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.