SAMOA, October 28 - Ua liligo le fogatia ua paū foi le tuavao aua lele ua taaseu le atutia ma nofoia tiasa ma tialologo. Ua mua mea i Matautu Sa pei ona faalaeiau le susuga i le failotu, fai lea ma o tatou taiala i lenei taeao ia tele ai le viiga o le Alii. Foai e le Alii le mau e tele i lana auauna, auā lana feau ma le talalelei.

O paia o lenei aso ua ma’ea ona paelago ma o le a lē toe oo iai se faamatalaga auā e lē toe aloina faalua se ogasami e tasi, ae tau ina faatulou i ai ma le faaaloalo. Peitai e ao lava ona pa’i i paia o le afioaga nei, i le afio o Leilua ma le Toalima. Afifio Sa Alalatoa ma Alo o Malietoa ma le Matua, alalatai oulua na Pule ma le Mamalu ia Safotulafai.

Ua nofofale ia Satuiamaa le faamoemoe, aua lea ua tatou molimauina le galuega tele ma le matagofie, i le toe faaleleia o potuaoga uma faapea le faaopoopoina o le fale tele poo le hall e tua i ai le aoga i ana polokalame fai.

E momoli ai le faamālō ma le faafetai i lau afioga i le alii Amepasa ma le malo o Iapani mo lenei poloketi ina ia lelei a’oga a alo ma fanau o le nuu nei. E faaleoina ai ma le loto faafetai i le lagolago malosi a le Komiti Aoga ma le PTA, o lo tatou nuu atoa i le faamaeaina o lenei galuega. Ua iloga lo outou sao ma lo outou titi fai tama, ina ia popoto ma manuia fanau ia i le lumanai.

Tasi lenei o aoga ua matauina le faatupulaia o lona aofaiga mai tausaga ua te’a seia oo mai i lenei tausaga, e 250 tamaiti aoga oloo aoaoina ai ma le aufaigaluega galulue e toa valu. O le ata manino lea o le alualu i luma o taumafaiga e le gata i polokalame a lo tatou malo ma le matagaluega, ae o le o gatasi ma le soosoo tauau a matua ma le komiti aoga.

Faamalo faafetai i le Komiti Aoga ma matua, tainane alii ma faipule i le taulagalaga i mea lelei ina ia saogalemu nofoaga e aoaoina ai tama ma teine o le laumua.

Tatou opogi le taumafai mai a le malo ma le matagaluega, ia unaia fanau e faaaoga le tele o polokalame fou ua i totonu o aoga aemaise o lenei talutalu fou ma le faatekonolosi i ona itu lelei, pei ona molimauina i faalauiloa a le matagaluega ao i ai lo tatou atunuu i puipuiga o faamai.

Lau tōfā i le matua o faiva ma le falefa o lo outou aiga, faamālō galulue. Ia maua pea lo outou malosi e faaauau ai taleni mai i le Atua.

Faiaoga, ua tatou iai i le faaiuga o galuega o lenei tausaga, ia maua ni pine faamau lelei o lenei foi vaitau o le soifua aoaoina o alo ma fanau a’oga, ao faatili foe mo le a’e. Tama ma teine a’oga o Safotulafai, ia manuia suega faaiu o le tausaga. O lē lava sa lulu ma le faamaoni, e selesele foi ma le fiafia, ao lē sa tafao ma faamaimau taimi, ia e inu foi i lona taumafai.

E toe faafetaia a tatou paaga mo le fesoasoani mai. Ia alofa le Atua ma faamanuia.

A tatou taape ma tuua le mea nei, folau ia puipui mai aao alofa o lo tatou Alii

SOIFUA MA IA MANUIA.

October 30, 2020