SAMOA, June 23 - (OFISA O SO’OUPU); I lana Fonotaga FK(20) 25 o le Aso Lulu 24 Iuni 2020, na talanoaina ai e le Kapeneta le Pepa PK(20)604 ma faamaonia ai Teuteuga o Poloaiga mo le COVID 19 e pei ona auiliili atu i lalo:

1. Vaa Fagota ma Vaa Oloa I. Le faataga ona pipii o vaa fagota i le Uafu i Matautu ia lē silia i le 48 itula mo le la’ueseina o uta i’a, ma toe faatutumu a latou supplies ao le’i tuuvaa ese atu ma Samoa;

II. Le faataga ona pipii i le Uafu i Matautu o ni vaa oloa se lua i le taimi e tasi, e fua i luga o ni mafuaaga tatau ma talafeagai ma le gafatia ona faatino vaega moomia mo le saogalemu e le Pulega o Uafu ma Taulaga ma isi itutino o le Malo;

III. Le faaauau pea ona faatino aiaiga o puipuiga Faasoifua Maloloina i le Uafu, mo le puipuiga o le atunuu mai le faama’i, e galulue faatasi ai le Matagaluega o le Soifua Maloloina, Pulega o Uafu ma Taulaga ma le Matagaluega o Faatoaga ma Faiga Faiva.

2. Taaloga Bingo I. Ua tatala taaloga bingo i le Aso Faraile ae tapunia i le 10:00 i le po;

II. E faatumauina pea taimi mo taaloga bingo i Aso Toonai e tapunia i le 5:00 i le afiafi.

3. Feoaiga i Vaa i le Va o Upolu ma Savaii I. Ua tatala feoaiga i Vaa i le va o Upolu ma Savaii, mo i latou e 60 tausaga ma luga atu le matutua;

II. Faaaoga o Pepa Faamaonia mo penisione a tagata matutua, e feoai fua ai i latou i vaa i le va o Upolu ma Savaii. E amata faamamaluina o nei suiga i le Aso Tofi 25 Iuni 2020 seia toe iai se isi faaaliga.

E faatumauina pea isi aiaiga o Poloaiga o Faalavelave Faafuase’i na mua’i tuuina atu.

O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.

June 25, 2020