SAMOA, May 31 - Lau Susuga i le Taitai o le Sauniga       

Lau Afioga i le Sui o le Fono a Sui Tofia

Lau Afioga i le Alii Palemia ma le Kapeneta, ma Minisita Lagolago 

Lau Afioga i le Faamasino Sili ma Alii ma Tamaitai o le Faamasinoga 

Lau Afioga i le Fofoga Fetalai ma Sui Mamalu o le Palemene 

Members of the Diplomatic Corps poo Sui o Malo mai Fafo

Faauluululuga o Matagaluega ma Faalapotopotoga a le Malo 

Le Paia o le Aufaigaluega Totofi a le Atua

Le Paia o Samoa o loo faafofoga mai i maota ma laoa, ma soo se tafa o le lalolagi. O paia auā Aiga ma a latou Tama, o Tama foi ma Aiga, Tumua ma Pule, Ituau ma Alataua, Aiga i le Tai ma le Vaa o Fonoti.

E ofo alofa atu i le maleifua mai o le atunuu i faguga malie i lenei taeao matagofie, i le lagi e mamā ma le soifua laulelei.

E faatalofa atu foi i le Afioga i le Kovana o Amerika Samoa ma le faigamalo a

Tutuila ma Manu’a. O paia auā le Pulega Faatonu, Le Faamasino Sili ma le Ofisa o Faamasinoga, Le Fofoga Fetalai ma le Peresetene, ma Sui Mamalu o Maota e lua o le Fono Aoao Faitulafono a Amerika Samoa. O paia auā Sua ma le Vaifanua, Fofō ma Aitulagi, Ituau ma Alataua, Saole ma le Launiu na Saelua. Afifio o Faatuiolemotu, Alalatai tootoo o le Faleula ma Upu i le Manuatele.

Ae matau mamalu uma i Paia Silisili o le Atua le Tamā, le Alo, ma le Agaga Paia, o le Atua o Aperaamo, Isaako ma Iakopo; o le Atua o Isaraelu, o le Atua o Samoa, o loo faavae ai lo tatou Malo Tutoatasi.

Ē, le sā na teufolau e tafesilafai le ao, lea ua tuta i nuu manaia. Lafo ia le taula i malolo, sei faailo i lagimalie le viiga o le Atua, auā o Ia sa tūtaumua i taisou, ma taialaina lā tatou faigamalaga.

Ua faiva ese lenei tausaga i sauniga mo le faamanatuina o le 58 tausaga o lo tatou Tutoatasi. O loo tatou iai nei i ituaso faigata ma ma’aleale, ona o puipuiga o le atunuu mai le faamai o le koviti 19. E le o toe po malaē i mafatiaga ogaoga ua feagai nei ma le lalolagi, ona o le pepesi o lenei faamai, ma fano ai le toatele o tagata, ma ua solovi ifo ai tamaoaiga o atunuu uma. Peitai o Samoa, o loo saogalemu pea i le puipuiga malu a lo tatou Matai Sili. E afua lava foi ona lape le tatou faatautaiga ona ua tatou faatamala i le musumusuga lilo a le Agaga Paia o lo tatou fesoasoani sili, a ua ta’aina i tatou i tuinanau o le soifuaga faaneionapo i le lē usitaia o lapataiga o le faautautaga tatau .

O le ala lea ua faatino uma ai sauniga o le tutoatasi o lenei tausaga, e faaaoga ai masini ma alaata faaneionapo, e momoli atu ai i le atunuu o loo silasila maimoa ma faafofoga mai, le faatauaina pea o lenei aso iloga i lo tatou tala faasolopito, le aso o le Tutoatasi.

Samoa e, o upu faavae o lenei aso, o loo momoli mai e upu tomua o le Vii o le tagavai o lo tatou Malo Tutoatasi, ‘Samoa tulai, ma sisi ia lau fu’a, o lou pale lea, vaai inā fetu o loo ua agiagia mai, o le faailoga lea o Samoa ua mafai na e tautai’.

Ua 58 tausaga o lou Malo tutoatasi mai le Atua. E te alii-o-aiga Samoa i le saofaiga a Malo uma o atu motu tutoatasi o le Pasefika. O ai na mafua ai? E mavae le fuga matagofie o aatasi, e mou le tafa felofelo o tafa’ilagi, e tafia le malosi ma le poto o le tagata, peitai, o le Mataisau, o le Silisili Ese, o lē Pule aoao, sa ia tautai ma faatonufolau i lau folauga. O lona alofa tunoa o loo ta’ui ma talipupuni ai si o tatou atunuu i matagivale o le soifuaga nei. E manatua ai foi ma le agaga faafetai le tauasaina mai o lo tatou Malo Tutoatasi, ma lona faafoeina e o tatou tuaa ma o tatou taitai, mai i le amataga seia o’o mai i le asō.

Ua tupu le atunuu ma lona atinae, ma ua niuali galuega tetele e tua iai tupulaga o nei ma ē luā. Ua siitia maoae le tomai o tamafanau a Samoa latou te faatonutonu, faufautua ma faafoe le Malo, ma itu mavae uma o le tamaoaiga, e lalago ma sooula ma le Pulega mamalu a Alii ma Faipule, augafaapae, saoao, faletua ma tausi ma le malosi o nuu. Ae ā le sao tele o le aufaipisinisi tumaoti e lalago faatasi ma fuafuaga a le Malo mo le atinae o le tamaoaiga. Ae matua le tu’u i faiva faaositaulaga i le galuega a le aufaigaluega totofi a le Atua, o lo’o tatalo ma talosia faiva o Samoa i aso uma. O lo tatou sa e fautele, auā o Samoa ua fesaua’i gafa, e sootuli ma sootauau, e faisao i le soifua manuia o le atunuu atoa.

Faafetai le galulue ma le tautua atunuu, faamalo le pale, malo le faatoatoa. O galuega lelei uma ua faatino e lo tatou Malo ma ana Matagaluega ma Faalapotopotoga, faapea Ekalesia, pisinisi ma faalapotopotoga tumaoti, o afioaga ma alalafaga, o fanau, aemaise le mamalu o Samoa o loo papaaao i atunuu mamao ma tauave ai pea le igoa pele o si o tatou atunuu o Samoa, ia tatou noanoa ia mo le viiga o le Atua e faavavau.

E momoli atu foi le faamalo ma le faafetai i a tatou paaga mai fafo i lo latou fesoasoani mai pea ia Samoa, i soo se auaunaga o loo latou faatinoina. O lo latou

sao i le atinaeina o Samoa i soo se vala, o loo vaavaalua ma le Malo i galuega auā le manuia lautele o le atunuu. Ia saga faamanuia le Atua i lo latou agalelei. Ia tatou tatalo foi mo le faamafanafanaga a le Atua ma Lana faamalologa, i le feagai ai o o latou atunuu ma le faamai koviti 19.

Le atunuu e, e ui ina o tatou iai i nei vaitau faigata, ia mau pea lo tatou faatuatuaga i le Atua. O auupega ua tuuina mai e Iesu Keriso, o le Ao o le Ekalesia mo ē e faatuatua ma talitonu ia te Ia; o le tatalo ma le anapogi, ma le viiga e le aunoa e tuuina atu ia te Ia. O le faavae papa lea e lē maluelue, e faamanatu mai ai pea ia i tatou pe afai e ta’aliligia matagilēmoe, ma le osofai mai o luitau o le ola nei. E ui foi ina tetele ā pesega ma finagalo e lagalagā i nisi taimi, pei a nunu ai le toau, e matua lava i le ōō. Aisea? Auā o tu ma aganuu a Samoa e faavae i le alofa ma le faaaloalo. O Samoa foi, o le atunuu e faavae i le talitonuga Kerisiano, ma e ta’uta’u faaaliali le Atua i ona upufai o aso uma. O la’u tatalo, ia i ai le filemu o le Atua i lo tatou atunuu, faapea le lalolagi atoa. Ia tatou tatalo foi mo Isaraelu le nuu filifilia o le Atua na soifua mai ai Iesu Keriso lo tatou alii ma le faaola.

O le numera 19 o le faama’i o le Koviti, a feliua’i ona maua lea o le numera 91. Ona ou aumaia ai lea o le mau a le fai Salamo i le lautusi e 91 e faapea, “E te le mata’u i le faama’i e fealua’i i le pogisa, ma le mala e fano ai i le aoatea. E pauu se toaafe i ou tafatafa, ma le mano i lou itu taumatau, ae le taitai ane ia te oe.” Auā o le Alii o lo tatou malu Ia ma lo tatou olo, na te laveaiina i tatou i le faamai e oti ai.

Samoa e, tatou tumau i le paolo o aao alofa o Iesu, tatou te malu ai.

Ia faamanuia tele le Atua i lo tatou atunuu. Ia manuia le faailogaina o le 58 tausaga o lou Malo Tutoatasi, Samoa.

SOIFUA

June 1, 2020