SAMOA, June 1 - ASO TO’ANA’I, 1 IUNI, 2024 – 7:00 I LE TAEAO

Susū lau Susuga i le Ta’ita’i o le Sauniga – Lau susuga i le Tausi Matāgaluega, Rev. Fa’apea Elia,

Afio lau Afioga Patele Ricky,

Susū Susuga i Tama’ita’isā o le Ā’oga Sagata Maria,

Susū Susuga i Faiā’oga o Ā’oga ‘ese’ese ua fa’atasi mai i lenei taeao,

Susū lau Susuga i le Ta’ita’i o le Auatama,

Le mamalu o Autalavou a Ekalesia ‘ese’ese o le Itumālō o Faleata #1,

Le pa’ia ma le mamalu o le auvalā’aulia uma ua afifio ma maliu mai i lenei taeao, tatou te molimauina le fa’ailogaina o le 62 tausaga o le Tuto’atasi o si o si o tatou Mālō o Samoa.

E manatu o lea ua motu i lagī le fetu tali matagi, ua togi pa tau i le ‘ave, ua fa’afofoga fo’i Ieova i le tatou taulaga molia i lenei taeao. Fa’afetai i lau Susuga i le tausi Matāgaluega, lau Susuga Fa’apea Elia.

O le ā ou lē toe poupouina fa’afale gase pa’ia o lenei taeao, auā o pa’ia ma faigatā o Samoa e tumau lava mai le vavau se’ia o’o i le fa’avavau. Ae o le a nu’unu’u atu ia fa’atini o tausala, auā e leai se ma’ema’e na te toe atofuliina outou sā ma faigatā, ua taoto a’o se ala o’o, ua ta’oto fo’i i fata ae a’e i lumāfale.

E momoli ai le fa’afetai i lau afioga i le Tofi o le Itumālō, lau Tōfā Manuleleua Paletasala Talitau, fa’apea le pa’ia o le afio’aga nei. Auā le afio o le Tama a le Fale, susū le Usoali’i ma le Matua iā Patau’ave. Maliu mai lo oulua To’alua Une ma Manuleleua, ma ō lua ‘āiga, susū le Nofoatama ma le matua iā To’ala ma Tiufea, le pa’ia o le malae ma le mamalu iā te oe Vaimoso ma Faleata.

E iā te a’u le agaga fa’afetai tele mo le valā’au fa’aaloalo, ua fai ai a’u ma sui o le tatou Mālō. Le afio o le afioga i le Ao Mamalu o le Mālō o Samoa, Afioga i le Sui o le Fono o Sui Tofia, le afioga i le Tama’ita’i Palemia, ma le mamalu o le Kapeneta, e alagaina le galu ma si’itia le atu o le taeao, ona o lea ua ‘ape foe tasi le sā o Samoa e fa’atili foe mo le a’e, auā le fa’amanatuina o le 62 tausaga o le Tuto’atasi o si o tatou Mālō o Samoa.

Tatou te fa’afetaia ai le alofa ma le agalelei o le Atua auā o lana foemua, ma to’o i manino, ma lave i vasa o fītā a’o tatou folau mai ai i lenei tausaga.

Fa’afetai fo’i i le tōfā ua a’e, ma le fa’autaga sa’ili, ua mafai ai ona fa’amanatuina e le tatou nu’u ma le Itumālō Faleata #1, le Aso Soifua o Samoa. Ua fa’amālō le fa’ama’ite i mea lelei ona o si o tatou Mālō o Samoa.

E manatu, e lē tau fa’afuluina ou ‘ele’ele sā, auā o le ‘ele’ele na fafatu ai le tala fa’asolopito o Samoa, o le malae na sa’ausi ai le tōfā sausau mamao, i Tama ma ‘Āiga, ae fulifuli fa’alā’au mamafa i ai le fa’autautaga, na sa’ili ai mālō i le va’a fetalai iā Tumua ma Pule, Ituau ma Ālataua, ‘Āiga i le Tai ma le Va’a o Fonotī. E le’o ni ‘upu e avane ai, ae a le fale o le Mau lea e poupou i ‘ele’ele o le alalafaga, o le fale lea vae atu Samoa, na fanau mai ai le Maota Fono o lo’o i Ti’afau po’o le Maota o le Fa’autugatagi a Samoa. Auā o tofiga a Malietoa Taulapapa nai si’u faitoto’a ma tulimatala, o oe Faleata e te faleo’o, e tua i ai le faletele o le lau’ele’ele na tofu malemo i le afu liligi ma le afu sasa’a o tulatoa ma le ‘au fue loloa, i le sā’iliga o le Mālō Tuto’atasi o Samoa.

E fa’afetai a’e ai le agaga i le Atua i lenei laolao manaia ua tatou potofia, ma va’a e tasi, e lagiina ai pese ma vi’iga ina ua tatou aulia manuia le 62 tausaga o le Mālō Tuto’atasi o Samoa.

O lenei ua punapuna’a manufou i le alofa tulituliloa o le Atua, ua mafua ai ona o tatou tapisa i mālō ma ta’aseu i le manuia.

“IA MANUIA TELE LE FA’AMANATUINA O LE 62 TAUSAGA O LE MĀLŌ O SAMOA” i totonu o si o tatou Itumālō Faleata #1.

Ia amata mea le Atua, fa’ai’uina e le Atua fuafuaga uma o le a feagai ai i lenei aso.

SOIFUA MA IA MANUIA.

Ata Pueina – Malo o Samoa (Pesetā Tusiga Taofiga.)

Legal Disclaimer:

EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.