SAMOA, July 4 - O lea ua suluia ulufanua i le mālama o lenei taeao fou, ae gāfoa le ata ma totogo a’e le sau o lagī e puaina mai le soifua laulelei o si o tatou atunuu. O le asō, e mafua ona o le Atua. Ua tini ma taunuu le faamoemoe na tu’ulagi, ona o lona faamaoni. O le mea lea, tatou te molimau faatasi, e lelei, e lelei lava le Atua.

Lau Susuga i le Taitai o le Sauniga, le paia i le nofo a faafeagaiga, faapea tulaga tofi mamalu o le Ekalesia Worship Centre Wordwide, aemaise le paia maualuga o Samoa ua o tatou fai taulaga faatasi i lenei taeao, ou te faatalofa atu.

O lea ua tu le failā, auā le ala ma le mila, o le mauga paia o le Atua e tapuai ai lana fanau. O le viiga ma le faafetai e fo’i i le Atua, auā o lea ua o tatou patipatia le faaiuga manuia o lenei galuega tele. Ou te mautinoa sa tau fuafua ma faatatau lenei faamoemoe i le tele o tausaga, talu ona faavae le Ekalesia, ma sa outou momoli i le Atua le manaoga mo se malumalu tapuai. A lea ua taunuu i le taeao nei. O ai ea na mafua ai? O le Atua fai vavega lena, o ia na foaiina le tamaoaiga ma le sosia i o outou aao.

Ou te faafetai atu i le Taitai o le Ekalesia, aemaise le soifua finafinau o le Susuga i le Aposetolo i a Viliamu Mafoe ua fai i lagī le folauga, ma le loaloa o le Ekalesia aoao. O lo outou soifua ofoina atu e auauna i le Atua, e leo tele i le tino mai o lenei galuega. E i ai faafitauli, e lē taugofie, atoa ai ma le tele o taimi na moomia e faataulagaina mo le galuega. Faafetai le faatoatoa, faamalo le faitaulaga.

O lea foi e usu mai i Samoa nei le fonotaga a le Ekalesia ma faamoemoe e tofia ai lo outou taitai. Ou te tatalo, ia taitaifono le Agaga Paia, aua o Ia o lo tatou fesoasoani sili, e a’oa’o, faatonu ma taitai tatou i mea tonu uma lava, e ala i a Iesu Keriso. E avea ai a’u nei ma sui o le tatou Malo, e momoli atu ai faamanuiaga mo le faalagamaea a le Ekalesia, e ala i lana fonotaga i lena vaiaso fou. Ia manuia le tofiga o le Susuga i le Taitai o le Ekalesia. O le tatalo, ia manuia le galuega, ma ia so’ofau le taitaiga o le Ekalesia e pei ona faavaeina ai.

E faataua pea e le tatou Malo le tapueina o le soifua tapuai o Samoa i lo tatou Atua. O Samoa o le atunuu Kerisiano, ma e le se’e ese a’u nei ma le faigamalo i le faasinomaga a lo tatou Faavae, ‘E faavae i le Atua le Malo Tutoatasi o Samoa’.

O le laolao foi lenei ou te momoli atu ai le faafetai tele i le paia o le Ekalesia i lo outou fai tatalo mo le Malo ma si o tatou atunuu. Tatou te le mafaia se mea, pe afai e le auai mai le Atua. E faapei o la a Iesu ‘ e le mafai e lālā o le vine ona fua, pe afai e lē pipii i le vine’. Le paia e, o le vasega o faafeagaiga ma Tiakono, o le ‘au tatalo ma le vasega o misionare o le Ekalesia, tatou faamalolosi i lo tatou valaauina ma le poloaiga tele ua tuuina mai mo tatou, ina ia papatiso atu i le Suafa o le Tama, ma le Alo ma le Agaga Paia, ma fai nu’u uma lava ma so’o.

Ia manuia le loaloa o le Ekalesia i tagata lotu uma i Samoa nei ma atunuu e mamao. Ia faamanuia mai le Atua i le tatalaina o lenei galuega tele aemaise le tofiga o le Taitai o le Ekalesia Aoao, faapea le fonotaga a le Ekalesia i le vaiaso fou.

Soifua ma ia manuia

Legal Disclaimer:

EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.