SAMOA, November 28 - Tatalaga aloia ole Suega Siamupini ole Siva Afi 2020.Aso Toonai 28 Novema, 2020;

Ua motu nei i liu le atu mua a le tautai matapalapala, e pei ona mua’i fana ai le ū i le vateatea e le susuga ile taitai ole sauniga, aua lo tatou va tapuia ma le Atua. E saga mua ai pea mea i Matautusa ma sulaina le Alofa o le Atua ia Samoa, ma faatumauina pea le Lalelei o si o tatou atunuu.

O le tausaga lenei 2020, o se tausaga o luitau ma e taua tele i fuafuaga faataatitia sa faamoemoe e faataunuu mo le atinae o le Alamanuia o Tagata Tafafao Maimoa. Le atinae o loo avea ma poutu ole tamaoaiga o Samoa, peitai, e tatou te momoe pea ma manu ae sau mala e atiae.

Ile pagatia ai o le tatou tamaoaiga ona o aafiaga tuga ole Koviti-19, faapea le Misela ile faaiuga o lena tausaga, o loo galulue punouai ai pea lo tatou Malo e tauala ile Pulega o Tagata Tafafao Maimoa, i auala eseese e fesoasoani ai ile au fai atinae i totonu o lenei Alamanuia i le faatumauina pea o galuega a le aufaigaluega, faapea pisinisi tumoati.

Ole siva ailao afi, o se Taleni ua tautaua ai Samoa ile lalolagi atoa ile tele o tausaga, ma ose faatinoga na afua atu i Samoa, e iloa gofie ai foi lo tatou atunuu pe a faatinoina. Ua toatele alo ma fanau a Samoa ua faamanuiaina ai, e ala ile malaga atu i atunuu mamao ma aumau ai ona o le taleni ole siva ailao afi.

Ole lona 19 a’i lenei o tausaga talu ona faatautaia le Tauvaga Siva Ailao Afi Faavaomalo a le Ailoa Club of Samoa, poo le ‘Siva Afi’ e pei ona iloa ai, a le afioga ia Leota Lene & Claire Leota ma le aiga.

•E l tau faailoaina le Afioga ia Leota ma lona faletua ia Claire mo le la sao taua I lenei taleni. Ua loa foi tausaga o lana tautua ile aoaoina pea o a tatou fanau, ma auina atu i tauvaga i Samoa ma faavaomalo.

O lea ua maea le faatinoga o taamilosaga e saili ai i latou e lautogia i suega siamupini, na lagolagoina ai e le Malo le faatinoga o le tauvaga i le motu tele i Savaii, faapea tauvaga i Tumua nei.

O le afiafi nei la ma le faamoemoe, ole a iloa ai le auro ile afi, ma o le fautuaga mo tatou le fanau, faaoga lelei avanoa ua maua, ma faataua le taleni ua foai mai e le Atua.

O moomooga alofa na mo sui tauva uma ole a tausinio i le suega siamupini i le afiafi nei. O tou mama na. A tuuama le fua ma tatala le filialii, ia alofa le Atua ma faalaolao peau o le ala.

Ia manuia tele le faamanatuina ole 19 tausaga ole Tauvaga Siva Afi Faavaomalo 2020 – Ma ua tatala aloaia ai nei le Suega siamupini i lenei afiafi.

SOIFUA MA IA MANUIA.

November 29, 2020