SAMOA, June 26 - (ASO 26 IUNI 2020); E tusa ai ma le vaega 36 o le Tulafono 1972 a le Faaputugatupe mo le Lumanai Manuia o Tagata, ua faamaonia nei e le Minisita, Komiti Faatonu ma le Pulega le tului e 9.1% mo le tausaga faa-le-tupe faaiuina i le aso 30 Iuni 2020 i lona tau aofai e $64.5 miliona tala – o se tinoitupe faamealofa ua pito i maualuga lea i le tala faasolopito o le faalapotopotoga.

O loo mataitu lelei e le Faalapotopotoga le tulaga pagatia foi o loo iai le lalolagi ona o le faamai o le Koviti-19. Ma o lo o mautinoa foi le aafia ai o le faasoa tau tupe a le tele o aiga o si o tatou atunuu ma le au faisaofaga ona o le aafia o Samoa i le tulaga faaletonu o le tamaoaiga o le lalolagi.

O le mafuaaga tonu lea ua ae ai le tofa i le Pulega ma le Komiti Faatonu e alagatatau ona maualuga ia se meaalofa mo le au faisaofaga i lenei tausaga. O le tulaga lea ua totogi tupe ai le $43.2 miliona tala mo le au faisaofaga e tusa ma le 6.1% o le tului faameaalofa ua faamaonia nei.

O le faamatuuina o lenei meaalofa e fuafuaina e faapea;  $7.8 miliona (1.1%) na totogi tupe i le au faisaofaga i le Aso 2 Tesema 2019  $21.3 miliona (3%) o le a tuuina sao i saofaga a le au fai saofaga i le Aso 1 Iulai 2020  $14.2 miliona (2%) o le a totogi tupe i le au faisaofaga i le Aso 1 Iulai 2020  $10.6 miliona (1.5%) o le a totogi tupe i le au faisaofaga i le Aso 30 Novema 2020  $10.6 miliona (1.5%) o le a totogi tupe i le au faisaofaga i le Aso 22 Mati 2021  Tau aofai o le meaalofa: $64.5 miliona

E faatino ma le agaga fiafia tele e le Komiti Faatonu, le Pulega ma le aufaigaluega a le NPF ia lenei faamoemoe ona o le telé o le fesoasoani o le a fai ma faamamaavega i le mamalu o si o tatou atunuu o loo fai saofaga i le NPF.

O le faaneetaga, faafetai ma le viiga atoa e tuuina atu i lo tatou Atua Silisili Ese, le Alii o Iesu, o lé na te mafaia ona faia o mea uma e faasilisili lava i mea tatou te ole atu ai ma mafaufau i ai, e tusa ma lona mana o loo matuá galue i totonu ia te i tatou.

Faafetai Minisita, le Komiti Faatonu ma le Pulega

June 26, 2020