SAMOA, June 26 - E tusa ai ma le Poloaiga mo Fa’alavelave Tutupu Fa’afuase’i aemaise le malu puipuia o Samoa, e fautuina ai le mamalu ole atunuu, e lē o fa’atagaina so’o se tagata i nofoaga olo’o tā’ua i lalo: • Malae Va’alele Fa’avā-o-Mālō i Faleolo (Aso To’onai 27 Iuni, 12 ile vaveao-11:59 ile po) • Nofoaga o le a fa’anofoesea ai (Quarantine sites) i latou na faimalaga mai i Niu Sila (27 Iuni – 11 Iulai, 2020)

Ua na o le aufaigaluega a le Matagaluega o Soifua Maloloina ma le Ofisa mo Fa’alavelave Tutupu Fa’afuase’i olo’o fa’atagaina i totonu o nei nofoaga mo auaunaga mo’omia. Mo le silafia, o le solitulafono lou lē usita’ia o nei tu’utu’uga po o nei tapu, ma e ono fa’asalaina ai oe i lalo o Poloaiga mo Fa’alavelave Tutupu Fa’afuase’i 2020, po o le Tulafono Fa’afoega o Fa’alavelave Matuia ma Fa’alavelave Tutupu Fa’afuasei 2007.

E fa’amanatu atu o nei tapu ua faia ina ia malu puipuia le atunu’u lautele pe afai e iai seisi na malaga mai ae sa aumau pe ūia se nofoaga ua aafia i le faama’i o le Coronavirus. E mana’omia la outou lagolagosua ina ia mafai ona faataunuuina ma le manuia lenei faamoemoe taua.

Fa’afetai Ulu Bismarck Crawley Faauluuluga o le Ofisa o Fa’alavelave Tutupu Fa’afuase’i

Disaster Management Office – Samoa | Samoa Police Service

June 26, 2020