SAMOA, March 21 - OFISA OLE SO’OUPU A LE MALO; Ua faamaonia faaletulafono suiga o le Poloaiga o Faalavelave Tutupu Faafuasei (Proclamation of Emergency) mo le Coronavirus (COVID19) e le Ao Mamalu Malo le afioga, Tuimaleali’ifano Va’aletoa Sualauvii II ile afiafi nei ile maea ai o le Fonotaga Faapitoa a le Kapeneta.

O nei suiga e aofia ai faiga malaga a vaalele i le va o Samoa, Niu Sila ma Ausetalia.

O le poloaiga fou ua taofia ai nei faigamalaga uma ile va o Samoa ma Ausetalia.

Ae mo Niu Sila ma Samoa ua faatulafonoina e na o le taitasi malaga ile vaiaso a le Samoa Airways ma le Air New Zealand.

O se tasi o suiga o lea ua toe faamalosia o le taofia o potopotoga faalauaitele uma e oo atu i le 5 tagata, e aofia ai pe sili atu (e aofia ai tapuaiga, maliu, umusaga, taaloga faitupe, aso fanau, reunion ma isi potopotoga uma).

E le gata i lea ua faamalosia foi le tapunia o fale kalapu, ma nofoaga faitele e pei o fale tifaga ma fale pia, e aofia ai ma pa pia i totonu o fale talimalo.

E amata faamamaluina nei poloaiga i le itula e 12:00 midnight i le Aso Sa 22 Mati 2020, ma e toe iloiloina i le lua (2) vaiaso o lumana’i.

O lenei faaiuga ua faaleaogaina ai le FK(20)Faapitoa 7 o le Aso 20 Mati 2020.

O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.

O se aotelega lea ole Poloaiga ua faamalosia faaletulafono e le Ao Mamalu ole Malo ua toe faasoa atu mo le silafia ele atunuu;

I lana Fonotaga FK(20)Faapitoa 8 o le Aso Toonai 21 Mati 2020, na talanoaina ai e le Kapeneta le Pepa PK(20)308 ma faamaonia ai e faapea:

i. Le faia o le faaaliga faasalalau o Faalavelave Tutupu Faafuase’i e uiga i le pipisi ai o le faama’i o le coronavirus (COVID19), e tusa ai ma aiaiga o le mataupu 105 o le Faavae o le Malo Tutoatasi o Samoa (Constitution of Samoa);

ii. Le amatalia o le vaiaso anapogi ma tatalo i aiga uma o Samoa, mai le Aso Sa 22 Mati 2020 i le Aso Toonai 29 Mati 2020, mai le 6:00 i le taeao seia aulia le 12:00 i le aoauli;

iii. Le toe faamalosia o le taofia o potopotoga faalauaitele uma e oo atu i le 5 tagata, e aofia ai pe sili atu (e aofia ai tapuaiga, maliu, umusaga, taaloga faitupe, aso fanau, reunion ma isi potopotoga uma);

iv. Le taofia o taaloga, ma faafiafiaga uma e ono tumutumu iai tagata;

v. Le tapunia o fale kalapu ma nofoaga faitele e pei o faletifaga ma falepia, e aofia ai ma pa pia i totonu o fale talimalo;

vi. Le taofia ona toe taumamafa nisi i totonu o faleaiga (eat in), ae faamalosia na o le oka ma piki meataumafa (order and take away);

vii. Le taofia o le tumutumu i nofoaga o femalagaiga e pei o malae vaalele ma uafu;

viii. Le faaitiitia o faiga malaga o vaa i le tolu (3) aso o le vaiaso i le va o Upolu ma Savaii, ua nā o le Aso Sa, Aso Lulu ma le Aso Faraile;

ix. Le faaitiitia o le soona feoai, aemaise i latou ua 60 tausaga ma sili atu le matutua, sei vagana ua mātuā moomia ona vaai se fomai;

x. Le faatapulaa o itula e tatala ai maketi i Savalalo, Fugalei, Salelologa ma Vaitele ma isi maketi mai le 6:00 i le taeao ae tapunia i le 4:00 i le afiafi, ma e le toe faatagaina ona toe momoe ai nisi i nei nofoaga;

xi. Le tapu ona toe aga’i i le Falemai, sei vagana ua moomia ona vaai se foma’i. Ua faamalosia foi le tasi o le tausima’i e vaaia le gasegase, ma ia lē silia i le ta’itoalua tagata mo asiga o gasegase;

xii. Le taofia o pisinisi o loo faatino i tāfāala uma o le taulaga, e aofia ai ma le faatau savali o oloa e tamaiti (street vendors);

xiii. Le faatinoina e le PSC o se tulaga talafeagai mo le au faigaluega a le Malo e faaitiitia ai le ono pipisi o le faama’i e pei o le galulue mai i le fale e faaaoga ai initaneti;

xiv. Le tapunia o Aoga uma i Samoa seia toe maua atu se isi faaaliga;

xv. Le taofia o femalagaiga a pasi la’u pasese, ae faaaoga na o taavale laiti (taxis) e i lalo o le 5 pasese ma taavale a aiga pe a moomia;

xvi. Le tapunia o femalagaiga faavaomalo, sei vagana i latou e sitiseni ma nonofo i Samoa ma e tatau ona fai a latou COVID19 test, e faamaonia ai e lē o aafia i le vairasi i totonu o le lima (5) aso, ao lei toe malaga mai i totonu o Samoa;

xvii. Le taofia o malaga uma faalemalo i atunuu i fafo seia toe iai se isi faaaliga;

xviii. Le taofia o malaga uma ua fuafua mo galuega faavaitaimi i Niu Sila ma Ausetalia (RSE, SWP, PLS) seia toe iai se isi faaaliga;

xix. Le taofia o le malaga ese atu o fanau sikolasipi ua tapena mo aoaoga i fafo, seia toe maua atu se isi faaaliga;

xx. Le faaitiitia o malaga a vaalele i Aukilani i Niu Sila mo le alu ma le toe fo’i mai i le tasi i le vaiaso mo le Samoa Airways ma le Air New Zealand;

xxi. Ua taofia malaga uma i le va o Samoa ma Ausetalia;

xxii. Le taofia o malaga uma i le va o Samoa ma Amerika Samoa seia toe iai se isi faaaliga;

xxiii. Le taofia uma o malaga i le va o Samoa, Fiti ma Tonga seia toe iai se isi faaaliga;

xxiv. Le faatinoina o malosiaga faapitoa a Ofisa Sili o Matagaluega ma Faalapotopotoga a le Malo e faatino fuafuaga mamao a le Malo i le tali atu i le corona virus (COVID19);

xxv. Le taofia ona toe auina atu i Niu Sila o gasegase mo togafitiga i lalo o le Polokalame o le Samoa Medical Treatment Scheme (SMTS), seia toe iai se isi faaaliga;

xxvi. Ua faatonuina le Matagaluega o le Soifua Maloloina ina ia saga faamalosia ma unaia polokalame faalauiloa o le puipuiga o le pipisi ai o le faama’i, mo le nofo silafia o le atunuu;

xxvii. Ua faatonuina le Matagaluega o Leoleo ina ia faatino le mata’ituina o nei fuafuaga uma;

xxviii. E amata faamamaluina nei poloaiga i le itula e 12:00 midnight i le Aso Sa 22 Mati 2020, ma e toe iloiloina i le lua (2) vaiaso o lumana’i;

xxix. O vaegatupe moomia mo le faatupeina o nei fuafuaga, e faatupeina mai vaegatupe talafeagai a le Malo.