SAMOA, March 6 - PEPA O FAAMATALAGA

6 Mati 2021

MATAUPU: PALOTA MUAMUA (PRE-POLLING) MO LE MAMALU O LE ATUNU’U UA 65 TAUSAGA AGA’I LUGA

E fia tu’uina atu lenei pepa o fa’amatalaga e fa’asa’oina ai se fa’amatalaga na faia i le Aso Faraile 5 o Mati 2021 e le ta’ita’i o le Vaega Fa’aupufai o le FAST i se tasi o ana faiga fa’alauiloa (road show) lea na fesiligia ai le mataupu o lo’o taua i luga e se tasi o tina na iai i lea fa’amoemoe.

Na saunoa le ta’ita’i o le Vega Fa’aupufai e fa’apea o le mafuaaga na teuteu ai le Tulafono o Faiga Palota ma tu’u ai i totonu le Palota Muamua (Pre-Polling), ina ia avanoa ma mafai ai e “tagata o lo’o iai manaoga fa’apitoa” ona palota muamua.

Na ia saunoa fo’i o le “fenumiaiga” lea ua iai i le Tulafono o Faiga Palota i le vaega tonu lea o le Palota Muamua, ona fa’aopopo ai ma le “mea fou lea ua sau nei ua a’afia ai ma tagata e ono sefulu lima tausaga ma luga”.

E leai se agaga i le Ofisa e tali atu i mataupu o lo’o fa’atalanoaina e so’o se vaega fa’aupufai ia latou fa’alauiloa ona e talitonu le Ofisa o le Komisi o Faiga Palota, e tatau i tagata palota ona maua le avanoa e fa’afogafoga ai i manulauti ma fuafuaga eseese a Vaega Fa’aupufai uma a’o le’i faia le latou filifiliga e auala i le latou palota.

Ae peita’i ane, e tatau ona fa’asa’o le saunoaga o lo’o taua i luga ona e ono avea ma tulaga e fa’asese ai le mamalu o le atunu’u aemaise lava i le taimi lenei a’o aga’i atu tagata faigaluega o le Ofisa o le Komisi o Faiga Palota e tu’uina atu le auaunaga i le mamalu o le atunu’u e agava’a i o latou maota ma laoa pe a filifili ai e fa’aogaina lea avanoa e palota muamua ai.

O aiaiga o le Tulafono o Faiga Palota i le vaega lea o le Palota Muamua, na pasia mai e le Kapeneta 2017 a’o le’i tu’uina atu ai le Tulafono o Faiga Palota i le Palemene mo lana fa’amaoniaga. Mai le 2017, na iai lava i aiaiga o tagata e agava’a i le Palota Muamua ia ē ua 65 tausaga ma luga atu. E LE O SE MEA FOU e pei ona saunoa iai le ta’ita’i o le Vaega Fa’aupufai o le FAST.

Mo le silafia e le mamalu o le atunu’u, e le fa’amalosia lo outou mamalu e Palota Muamua ae o le avanoa lenei ua aumai e le Tulafono o Faiga Palota mo i latou nei:

• tagata ua 65 tausaga ma luga atu;
• o latou e iai aafiaga tumau o le soifua;
• o latou e faigaluega i galuega ma auaunaga taua (essential services);
• fa’apea ma latou e malaga ese atu ma Samoa i le vaiaso o le Faiga Palota;

e fa’atino ai a latou palota a’o le’i o’o atu i le aso ua atofaina mo le Faiga Palota ma foia ai le aafia o latou i le tutu umi i kiu ma avea ma tulaga e ono a’afia ai lo latou soifa maloloina.

Ae a filifili lava i latou o lo’o agava’a e Palota Muamua e palota i le aso o le Faiga Palota, e lē taofia fo’i lea tulaga.

E avanoa pea le tatou Ofisa e fa’amalamalamaina ni mataupu e fia maua ai le fesoasoani mo le mamalu o le atunuu. Telefoni mai i le numera e leai se totogi 800-8683 mo nisi fa’amatalaga.

Fa’afetai.

Ofisa o le Komisi o Faiga Palota