SAMOA, September 26 - Fa’afetai i le vala’au o a’u tatou te auai i le asō e sami le 75 tausaga o le Malo Aufa’atasi – o se Fa’alapotopotoga fa’atuina fa’apitoa e Malō o le lalolagi ina ia fa’atumauina le galulue fa’atasi o Malō uma ia maua se lalolagi e to’afilemu, e fesoasoani ai,  ia si’itia ai le soifua o tagata uma i le itu tau i le tamaoaiga,  o a’oa’oga, o le ola soifua maloloina, ma tu’uitiitia ai le mativa, tainane foi le saolotoga e tapua’i ai saoloto ai tagata lautele i ō latou talitonuga fa’aletapua’iga, le fa’aali saoloto o latou finagalo faitau eseese, aemaise o le mausali o le puipuiga o le saogalemu, o tagata lautele e ola i le tulafono ma le fa’atinoina o le fa’amasinoga tonu i ā latou fa’ai’uga fai.

Mai lava i le amataga o le tala fa’asolopito o le lalolagi mai iā Atamu se’ia o’o mai lava i le taua tele talu ai a le lalolagi, na fa’apogai ai le faigāmalo a Hitler, na’o le tasi lava le tulafono na tatou ola mai ai.  E fa’alupe o le “Law of the Jungle” – O le tulafono sili lea “O le ola fa’ameaola”.  O ai lava le manu e malosi, o le tupu āoāo lena.  O ai la le Tupu o Meaola – O le Liona.

Ae o le manu, e leai se mafaufau ola na te iloa ai le mea e lelei ma le mea e leaga.  E ui la o lea ua fa’atu le Malo Aufa’atasi, olo’o taumafai lava le Malō  Aufa’atasi ina ia ausia le fa’amoemoe ola na fa’atu ai a’o lea lava o lo’o tatou maitauina le fausia pea o meatau malolosi e osofa’i ai e isi Malō nu’u tu tuaoi e fa’aalia ai le ola pea o le Tulafono Fa’ameaola – e fa’aaogā ai le malosi o meatau e fao ai ese Malo eleele o isi Malō vaivai tu tuaoi.

Mo tatou tama’i Malō, o lo’o tatou maitau foi ma le toto’a uiga o upu felafoa’i ma fa’aaoga tatau ai le malosi o le tatou palota i totonu o le Malō Aufa’atasi.  O le tatou palota la e tasi ole aupega lena e tutusa lelei lava ma le palota e tasi a Amelika, Lusia ma isi Malō e matuā tuu iai le malosi o le  mafaufau e fa’aaoga fetala’i tatau ai le tofā mamao ia maua se ‘ai mo Samoa i le io, leai, po’o le tu i le vā, ma fa’aauau ai pea lo tatou vā lelei.

E iai foi le latou faitau e fai aso le Atua ma e oso pea le la.   E fa’apenā ona fai fetu’utu’una’i tonufai o le tatou Malō i le va ma isi Malō i le pulega a le Malō  Aufa’atasi.  E feāloāloa’i.  O lo’o maitau lelei mai foi e Malō Aufa’atasi, le Malō o Samoa ma le fa’avae o ana fa’ai’uga fai.

E fuafua ai foi e tatou pa’aga fesoasoani e aumai iā Samoa e tusa ai ma tatou talosaga.  E leai se Malo e fia aumai ni fesoasoani peā o latou maitauina e vevesi ma fetaua’i.  Aua o le uso o Malō fevaevaea’i, o le fa’aaoga sesē o fesoasoani latou te aumai.  E sesegi ‘ese ai foi ma latou e fia fa’atu ni latou atina’e tetele i Samoa.

I le taimi nei ma le tulai mai o le faamai o le Koviti-19, ua iai foi fesoasoani fa’atafe mai e Malō Aufa’atasi ia Samoa mai i ona lālā eseese.  Ua fa’aopoopo atu ai nei le Koviti 19, i fesuia’iga o le tau ua lua ai mala matautia ua feagai ma le lalolagi atoa.  Ua iai fofō ua fa’agasolo nei ae mo’omia pea le felagolagoma’i o Malō uma o le lalolagi i so’o se auala e faatino ai le manulautī na fa’atu e le Malō Aufa’atasi.  Ia malutia ai i tatou uma i ona aao alofa.   

Soifua.

September 29, 2020