Faapafala e le HRPP le $200,000 i le Malo
SAMOA, August 31 - (OFISA OLE SO’OUPU); Ua faamaonia le faapafala e le Vaega Faaupufai e Puipuia Aia Tatau a Tagata (HRPP) le vaegatupe e $200,000 na fuafuaina e tuuina atu mo le Faafaletui, i le Tala o le Tupe a le Fono Aoao Faitulafono Faitulafono 2020-2021.
O le faapafalaina e le HRPP o lenei vaegatupe, na faamaonia i le Faaiuga a le Kapeneta i lana fonotaga i le Aso 29 o Iulai 2020, FK(20)30, pe tusa o le masina atoa faatoā lomia e le nusipepa o le Samoa Observer i le laupepa i luma o lana lomiga o le Aso Sa 30 Aukuso 2020, le tala e faapea, “Ruling H.R.P.P. gets $200,000 from Legislative Assembly”, (Tauaaoina ele HRPP le $200,000 mai le Fono Aoao Faitulafono).
I le lauliliu o le tofa tatala ma le moe saili a le Faafaletui, le HRPP i le faamalumalu mai o tulaga ogaoga o le faama’I o le KOVITI 19, na fulisia ai le Vaega Faaupufai, i lana fonotaga na faia i le faatoā tasi o le vaiaso talu ona faamaonia le Tala o le Tupe 2020-2021, e taoto ma toe faafo’i le vaegatupe lenei i le Malo, e fesoasoani ai i galuega faatino uma mo le puipuiga o Samoa mai le faamai.
“O lenei vaegatupe na faamaonia le faaauau ai pea ona taoto i totonu o le Tala Faatatau o le Tupe o le Tausaga faaletupe lenei mo galuega o le puipuiga o le atunuu mai le faamai i le Faaiuga a le Kapeneta” na saunoa e le Failautusi ma o le Ofisa Sili o Pulega o le Matagaluega a le Palemia ma le Kapeneta, Agafili Tomaimano Shem Leo.
O lenei vaegatupe e faamatuu atu i tausaga faaletupe taitasi i Vaega Faaupufai ua mae’a ona lesitala ma aloaia i totonu o le Palemene. Ae tatau i ia Vaega Faaupufai ona ausia aiaiga o le Tulafono Tumau a le Maota, lea e tatau ai ona lē i lalo ifo ma le valu Sui Faipule o se Vaega Faaupufai, faatoā mafai ai ona agavaa mo lea vaegatupe.
O lenei faiga mo Vaega Faaupufai na amata faatino pe tusa ma le 30 tausaga talu ai, ao seei le afioga I le Tootooalii – le Afioga Tofilau Eti Alesana i le tofi Palemia
O lenei vaegatupe o se fesoasoani mo Vaega Faaupufai mo le faatinoga o o latou tiute faavaega faaupufai e tusa ma tuutuuga o Tulafono ma Faiga Faavae ma tafiesea ai ni tulaga e faaono ulufia ai le faatinoga o faaiuga ma tonu fai i ni faiga faaalatua.
September 2, 2020Legal Disclaimer:
EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.
