SAMOA, March 24 - OFISA OLE SO’OUPU A LE MALO; Ua faatulafonoina i le aso nisi o teuteuga faaopoopo i le Poloaiga o Faalavelave Faafuasei e le Ao Mamalu ole Malo le Afioga Tuimaleali’ifano Va’aletoa Sualauvi II e i luga o le fautuaga a le Kapeneta FK (20) Faapitoa 9, ma le Mataupu 106 o le Tulafono Fa’avae.

O nei teuteuga faaopoopo na faamaonia faaletulafono i le aso e aofia ai;

➡️Femalagaiga Faavaomalo vaalele ma vaa a lalo: (1) Sei vagana ni tulaga faanatinati e tatau ai ona fa’atino i luga o le Faamaoniaga a le Kapeneta, e tapunia femalagaiga faavaomalo i vaalele e amata faamamaluina ile 12.00 i le taeao o le Aso Tofi 26 Mati 2020. (2) E faaauau pea le tatalaina o le ulufale mai o vaa oloa, vaa fagota ma vaa suauu ae ua faatonuina le Matagaluega o Soifua Maloloina ina ia matua faamalosia puipuiga ua faataoto mo le siakiina o tagata o auvaa.

➡️Vaa (1) E amata faamamaluina ile 12.00 i le taeao o le Aso Tofi 26 Mati 2020 le tapunia o alavaa mo le femalagaiga a tagata lautele ile va Savaii ma Upolu, sei vagana ai tagata malaga o auaunaga o oloa feaveai ma auaunaga a le Malo e moomia mo Savaii e faaauau pea ona faaaogaina ai vaa. i aso o lo o ta’ua i lalo.

➡️Supa Maketi 1. Ua faatapulaa nei itula e tatala ai supamaketi mai le 6.00 i le taeao i le 4.00 ile afiafi.

➡️Faasalaga mo le lē usitaia o Poloaiga: (a) E solitulafono le tagata e lē usitaia Poloaiga uma ua ta’ua i luga ma o sala nei, o le solitulafono: (i) mo le tagata taito’atasi, $200.00 mo le solitulafono muamua, ma le $500.00 i aso ta’itasi e fa’aauau ai le solitulafono; ma (ii) mo le faalapotopotoga faaletulafono, $5,000.00 mo le solitulafono muamua, ma le $7000.00 i aso ta’itasi e fa’aauau ai le solitulafono. (e) O se faasalaga e tuuina atu i lalo o lenei poloiga e tatau ona totogi i totonu o le 24 itula, ma o le lē usitaia o lea taimi faatapulaa, e mafai ai ona taofia i lalo o le vaavaaiga a Leoleo i se vaitaimi e lē sili atu i le 3 masina.

O le atoaga lenei ole Poloaiga o Faalavelave Tutupu Faafuasei ua famaonia ma faatulafonoina ele Ao Mamalu ole Malo;

1. Vaiaso Anapogi ma le Tatalo: Ia faamamaluina e aiga uma o Samoa, le vaiaso anapogi ma tatalo mai le Aso Sa 22 Mati 2020 i le Aso Sa 29 Mati 2020, mai le 6.00 i le taeao seia aulia le 12.00 i le aoauli.

2. Femalagaiga Faavaomalo vaalele ma vaa a lalo: (1) Sei vagana ni tulaga faanatinati e tatau ai ona fa’atino i luga o le Faamaoniaga a le Kapeneta, e tapunia femalagaiga faavaomalo i vaalele e amata faamamaluina ile 12.00 i le taeao o le Aso Tofi 26 Mati 2020. (2) E faaauau pea le tatalaina o le ulufale mai o vaa oloa, vaa fagota ma vaa suauu ae ua faatonuina le Matagaluega o Soifua Maloloina ina ia matua faamalosia puipuiga ua faataoto mo le siakiina o tagata o auvaa.

3. Potopotoga i nofoaga faitele: (1) Ua tapu nei ona toe faia ni potopotoga i nofoaga faitele uma e oo atu ile lima (5) tagata. (2) O potopotoga i nofooaga faitele e aofia ai tapuaiga, maliu, umusaga, taaloga faitupe, aso fanau, reunion ma isi potopotoga uma. (3) Ua tapu nei ona toe tatala ni fale kalapu, faletifaga ma falepia, e aofia ai ma pa pia i totonu o faleaiga ma fale talimalo, ma soo se ituaiga faafiafiaga uma e ono tumutumu iai tagata.

(4) Ua tapu nei ona toe tumutumu tagata i nofoaga o femalagaiga e pei o malaevaalele ma uafu, se’i vaganā o tagata e malaga. (5) Ua tapu nei ona toe tatala fale’aiga mo taumafutaga a tagata i totonu o faleaiga, ae faamalosia le oka ma faatau o meataumafa e taumafa ile fale.

4. Femalagaiga faalotoifale: Taavale laupasese (1) Ua tapu le toe faaaogaina o pasi la’u papsese, ma taavale la’u pasese e sili atu ma le lima (5) tagata e faaogaina. (2) E faataga le faaaogaina o taavale la’u pasese laiti, e i lalo o le lima (5) pasese, ma taavale a aiga pe a moomia. Vaa (3) E amata faamamaluina ile 12.00 i le taeao o le Aso Tofi 26 Mati 2020 le tapunia o alavaa mo le femalagaiga a tagata lautele ile va Savaii ma Upolu, sei vagana ai tagata malaga o auaunaga o oloa feaveai ma auaunaga a le Malo e moomia mo Savaii e faaauau pea ona faaaogaina ai vaa. i aso o lo o ta’ua i lalo.

5. Maketi ma Faleoloa Supamaketi: (1) O maketi uma e aofia ai maketi i Savalalo, Fugalei, Salelologa, Vaitele ma isi maketi: (a) e faatapulaa itula e tatala ai mai le 6.00 i le taeao i le 4.00 ile afiafi seia iai se isi faaliga; ma (e) ua tapu ona toe momoe ai nisi i nei nofoaga ile po seia iai se isi faaliga. (2) Ua faatapulaa nei itula e tatala ai supamaketi mai le 6.00 i le taeao i le 4.00 ile afiafi. 6. Faatau oloa i magaala ma tafaala: (1) Ua tapu nei ona toe fa’atau ni oloa i magaala ma tafaala ole taulaga i Apia, Vaitele ma Salelologa. (2) Ua matuā tapu ona toe faatau savali e tamaiti ni oloa i soo se taimi.

7. Aoga: (1) Ia tapunia uma aoga i Samoa, seia toe iai se isi fa’aliga.

8. Falema’i, ma’i, tausima’i ma siigama’i : (1) Ia faaitiitia le soona feoai, ae maise i latou ua 60 tausaga ma sili atu le matutua, se’i vagana ua mātuā moomia ona vaai se fomai. (2) Ua matua tapu ona toe ulufale se tagata i soo se falema’i sei vaganā ai, ua moomia ona vaai se foma’i. (3) Mo le tagata ua taofia: (a) ua nā o le tasi le tagata tausima’i e faataga; ma (e) e nā o le toalua (2) tagata e faataga mo asiga. (4) Ua taofia ona toe auina atu i Niu Sila o gasegase mo togafitiga i lalo o le Polokalame masani le Malo, seia toe iai se isi faaliga.

9. Aiaiga mo galuega a le Malo: (1) Ia faatino e le Komisi o Galuega a le Aufaigaluega a le Malo, (“Komisi”) ni aiaiga e alagatatau ona faatino mo tagata faigaluega a le Malo, e faitiitia ai le ono pipisi o le fa’ama’i e pei o le galulue mai i le fale e faaaoga ai initaneti. (2) O aiaiga e faataatia e le Komisi, e aiaia uma ai Ofisa ma Matagaluega a le Malo. (3) Ua tofia uma malaga faalemalo i atunuu i fafo seia toe iai se isi faaliga.

10. Tiute o le Matagaluega o Soifua Maloloina: Ia faatinoina e le Matagaluega o Soifua Maloloina le unaia o polokalame falauiloa o le puipuiga o le pipisi o le fa’ama’i o le Korona Vairasi 19, mo le nofo silafia o le atunu’u.

11. Malosia’ga o le Matagaluega o Leoleo: Ua tuuina atu ile Matagaluega o Leoleo le malosiaga e faatino ai le mata’ituina o lenei Poloaiga.

12. Malosiaga faapitoa o faauluuluga o Matagaluega: Ua tuuina atu le malosiaga i faauluuluga o Matagaluega ma Ofisa uma o le Malo, o loo iai ā latou malosiaga fa’aletulafono e faatino a latou malosiaga faaletulafono, faapea ai, le malosaga o faauluuluga e faatino le Fuafuaga Mamao a le Malo ile tali atu i le Korona Vairasi 19.

13. Faatupeina: O le faatupeina o fuafuaga a le Malo i lalo o lenei Poloaiga e faatupeina mai vaegatupe talafeagai a le Malo.

14. Faasalaga mo le lē usitaia o Poloaiga: (a) E solitulafono le tagata e lē usitaia Poloaiga uma ua ta’ua i luga ma o sala nei, o le solitulafono: (i) mo le tagata taito’atasi, $200.00 mo le solitulafono muamua, ma le $500.00 i aso ta’itasi e fa’aauau ai le solitulafono; ma (ii) mo le faalapotopotoga faaletulafono, $5,000.00 mo le solitulafono muamua, ma le $7000.00 i aso ta’itasi e fa’aauau ai le solitulafono. (e) O se faasalaga e tuuina atu i lalo o lenei poloiga e tatau ona totogi i totonu o le 24 itula, ma o le lē usitaia o lea taimi faatapulaa, e mafai ai ona taofia i lalo o le vaavaaiga a Leoleo i se vaitaimi e lē sili atu i le 3 masina.

Ua soloia le Poloaiga Faalavelave Faafuase’i Numera 2 o le aso 21 Mati 2020.

O lenei Poloaiga e amata faamamaluina ile aso 24 Mati 2020.