SAMOA, March 13 - MCIL; O le Aso Faapitoa mo Aiā Tatau a Tagata Fa’aaoga Oloa o le Lalolagi, o se aso e faamanatuina i tausaga taitasi i le aso 15 o Mati e faatauaina ai e le lalolagi aiā tatau e valu (8) a tagata o loo faaaogaina oloa  ae le gata i lea o le faatauaina o le puipuia o ia aiā tatau.

O aiā tatau e valu (8) nei;

1. Aiā Tatau i oloa ma auaunaga saogalemu
2. Aiā Tatau i faamatalaga o oloa ma auaunaga
3. Aiā Tatau e filifili ai i oloa lelei ma auaunaga talafeagai ma lou manao
4. Aiā Tatau faa-le-tulafono
5. Aiā Tatau mo le faamalieina o manaoga masani
6. Aiā Tatau e toe faaleleia ai se oloa, toe sui ma se oloa, poo le toe totogi foi o se oloa poo se auaunaga ua lē talafeagai
7. Aiā Tatau i se siosiomaga mamā
8. Aiā Tatau ia A’oa’oina

O le luasefulu ma le lua (22) ai nei o tausaga talu ona faamanatuina e Samoa lenei Aso Faapitoa mo Aiā Tatau a Tagata Fa’aaoga Oloa a le Lalolagi.

O lenei Aso Faapitoa mo Tagata Fa’aaoga Oloa o le Lalolagi sa amata faamamaluina i Samoa i le tausaga e 1998 ina ua pasiaina le “Tulafono o Fefaatauaiga Talafeagai 1998” ma se tasi o sini autu o le puipuiga lea o aiā tatau ma naunautaiga o tagata faatau ma fa’aaoga oloa. O le taimi nei ua toe teuteuina ma faalauteleina nei aiā tatau i le Tulafono o Faiga Faatauvaga ma le Puipuiga o Tagata e Faaaogaina Oloa ma Auaunaga 2016 ua suia ai le Tulafono o Fefaatauaiga Talafeagai 1998.

O le sini autu o le lalolagi mo lenei tausaga o “Tagata Faaaoga Oloa Gafataulimaina”. Peitai ua filifili le Matagaluega ia faamanatuina le faamoemoe mo lenei tausaga e ala i polokalame faalea’oa’oga i faioloa ma tagata faaaoga oloa i Savaii ia faatupulaia ai lo latou silafia i a latou matafaioi ma tiute  faaletulafono.  O le a faatinoina lenei faamoemoe i le Maota o Apita o Pisaga i Saleleologa i Savaii.