SAMOA, January 28 - (ASO TOFI, 28 IANUARI 2021)

Ua tigi pa’ō nei le uto e pei o le faiva i Tapalega. Ua tu lima foi le manu sa faalele i le vanimonimo, aua ua Togi Pa tau i le ‘Ave le Taulaga siitia e pei ona momoli ai la’au i Foga’a e le Ta’ita’i o le Sauniga, lau Susuga Peteru Fiaumi Taula, malo tapena, faafetai mo le Fe’au o le Talalelei. Alofagia e le Atua lou soifua galue aua Ia ma Lona finagalo.

O lea ua pau Tua’au ma Fuamalu, ua mamalu foi le Aitu i le Aoa, aua ua Aliitia Malaeti’a ma Tapulaai’a o Tua o Maauga;

E afio ai Satuala o le Aiga Faalagilagi, ma Oulua Suafa

Susu mai Su’a o le Ma’opu o Nafanua.

Afio mai Toleafoa o le Tapa’au Faasisina ma le Taauso

Susu mai Pule ma Mulitalo, o Se’etala-luma

Maliu mai Ape ma ‘Oe le Matua Tau’auve’a

Le Mamalu i le Falefitu ma Nofo a Itu-aiga

Ua afifio foi le paia o le Malo i afioga i Minisita o le Kapeneta, o Minisita Lagolago ma Faipule o le Palemene.

Susu mai Faauluuluga o Matagaluega ma Faalapotopotoga Tumaoti a le Malo.  Tainane le loaloa o le auvalaaulia.

O paia ma mamalu na ua agatonu ai lo tatou taeao fesilasilafai.

E fai si umi o taumafai galuega faaleleia mo lenei Auala. Na faailoa mai e tauala mai i le tou sui faipule le mafatiaga sa feagai ma le afio’aga ona o le faaletonu o le auala lenei, o lea na amata  mai ai loa galuega faaleleia sa faatino e le konekarate a Lee Transport i le tausaga 2017 i lalo o le polokalame o Galuega Faaleleia (Road Routine Maintenance) i le tau e $486,061.70 mo le 1.5kilomita.

Sa toe faatino tauofoga masani a le Malo i le tausaga 2018 mo le fausiaina o leisi 2kilomita sosoo mai gatai, ma manumalo ai le konekarate a Ah Liki Construction i le tau maualalo e $684,082.27.

O le tausaga na te’a nei sa toe faatino ai leisi tauofoga faalauaitele mo le 4.3kilomita mulimuli ma manumalo ai le konekarate a Lucky Construction i le tau maualalo e $2,056,728.71.

O lea la ua mae’a ona toe faaleleia ma fausia lenei auala faatasi ma alavai, e tusa ma fuafuaga ma aiaiga faainisinia.

E 7.8kilomita lona umi, 8 mita le lautele, 5.5mita le lautele ua faataina, ma ua soo atoa lona faataina sei oo atu i Aleisa. O le tau aofa’i sa faatupeina ai e le Malo e $3,226,872.68.

O le tasi nei o galuega e faaopoopo i le tele o isi auala tetele ma auala galue sa faatupeina e le tatou malo. E ui ona o lo o feagai pea le atunuu ma puipuiga ma sa o le Koviti-19, ae o lo o faaauau pea galuega faaleleia mo auala ma le tele o isi atina’e ina ia saogalemu ma faigofie femalagaiga aemaise ia maua pea galuega e faafaigaluega ai o tatou tagata.

Soo se galuega ua maea ona fausia e aofia ai ma lenei auala ua tatala i le asō, e le faalogologo tiga ai le Malo i le faataunuuina o ia tiute aua o galuega sa tapuaia e le pule mamalu a Alii ma Faipule faapea Faafeagaiga taulagi a le Afioaga.

Afai la ua mapu ē o le a fa’aaogaina lenei auala mai faafitauli sa asaina i aso ua alu, o le sini tonu lea o lo’o tulimatagau e le Malo e ala i ana atina’e ma fuafuaga alualu mamao.

Ia saga’i ane ‘ai o le Tai i la outou pulega i Alii ma Faipule o le tatou afioaga, e faaaoga lenei auala e faafaigofie ai ona aga’i mai lo tatou nuu i uta nei e faaaoga fanua mo faato’aga ma nisi atina’e o fuafuaina aua le manuia o le nuu mo a taeao ma alua.

E momoli atu le faafetai ma le faamalo i le pule faamalumalu a lo tou afioaga, aemaise le ‘au fai lotu mo talosaga a o faagasolo lenei galuega. 

Faafetai atu foi i Konekarate ale Lee Transport, Ah Liki Construction ma le Lucky Constructions mo le faatinoina o le galuega i fua faainisinia ma aiaiga talafeagai mo le fausiaina o lenei auala ina ia lelei ma umi lona faaaogaina.

Faafetai faapitoa i le Minisita o Galuega ma Atina’e Tetele, Komiti Faatonu ma le Pulega o Fealauaiga i le Laueleele mo le vaaia ma le mata-i-tuina o le galuega a o faagasolo.

Talosia pea si o tatou atunuu i lenei vaitau a o feagai ai ma le Faama’i faapea le louloua o le tau ma lologa ona o timuga tetele.

Faamanuia tele le Atua.

Soifua.

January 28, 2021