Rinne an tAire Talmhaíochta, Bia agus Mara, Charlie McConalogue T.D. cur síos inniu ar an tacaíocht atá curtha ar fáil i mBuiséad na bliana seo chun oiliúint a chur ar chomhairleoirí talmhaíochta agus ar mhaithe lena bhforbairt ghairmiúil leanúnach.

Dúirt an tAire "Bhí ríméad orm maoiniú a fháil le haghaidh líon nua tacaíochtaí d'fheirmeoirí i mbuiséad na bliana seo.  Measaim go mbeidh príomhról ag comhairle ghairmiúil ardchaighdeáin a chur ar fáil de réir mar a bheidh mo Roinnse ag cur na dtionscnamh nua iontacha seo i bhfeidhm, tionscnaimh mar an Clár um Oiliúint a chur ar Fheirmeoirí maidir le Sláinte agus Sábháilteacht, Bearta Agrachomhshaoil mar oiliúint sa Bhithéagsúlachta d'fheirmeoirí agus staidéir Bhithéagsúlachta ar an bhfeirm, tionscadal píolótach nua torthaí-bhunaithe agus tacaíochtaí nua don earnáil curadóireachta. Ar an gcaoi chéanna, de réir mar atáimid ag ullmhú do Chomhbheartas Talmhaíochta nua a thabhairt isteach d'fhonn cuidiú leis an earnáil freagra a thabhairt ar dhúshláin timpeallachta agus eacnamaíochta agus shóisialta, beidh an t-eolas is cothrom le dáta a chur ar fáil do chomhairleoirí talmhaíochta ina ghné lárnach inár gcur chuige."

Dheimhnigh an tAire go mbeidh a Roinn ag dul i mbun idirbheartaíochtaí go luath leis na páirtithe leasmhara cuí maidir le leagan amach na hoiliúna agus an bealach a chuirfear ar fáil í.

CRÍOCH

Date Released: 17 October 2020