SAMOA, October 13 - Saunoaga Autu a le Palemia, Susuga Tuilaepa Lupesoliai Sailele Malielegaoi mo le Tatalaina o le Auala i Aana Alofi II i Apolima. (14 Oketopa 2020)

Ua ma’ea momoli lapalapa o malo i le faapolo ma le faasagi e ta’ui ai lo tatou va tapuia ma lo tatou Tapaau i le lagi, e momoli ai le faafetai i le taitai o le sauniga mo le tapenaga matagofie ma le ma’ea’ea. Faamanuia le Atua mo le galuega.

Tau ia ina ou sa’ua i le va ma ou faatulou le susu ole Aiga Sa Sa’u, susu Tooa ma le Usoalii, alalatai le mamalu ia Sauma. Ua afifio foi paia o le Malo i afioga i Minisita o le Kapeneta, o Minisita Lagolago ma Faipule o le Palemene.

Susu Faauluuluga o Matagaluega ma Faalapotopotoga Tumaoti a le Malo, tainane le loaloa o le auvalaaulia. O paia ma mamalu na ua agatonu ai lo tatou taeao lauluafesilafai.

O le auala lenei e 1000 mita lona umi ua faataina, ma ole Kamupani a le Webster Works na fausia lenei auala i le tau atoa e $846,411.50 ina ua manumalo i tauofoga faalauaitele masani a le Malo ma o se faiga faale Malo lea e taofia ai ni faiga fa’aalatua.

Le gata o le auala lea e agai ai le filifiliga i le Kamupani e taugofie ae e unaia ai foi ma le fai mea lelei aua e faaletonu loa se galuega ona le toe filifilia ai lea i nisi galuega i le lumanai. Ua iai foi ma Kamupani ua faamuta a latou konekalate ona o le le faamaoni.

O galuega fa’aauau faifaipea lenei a le Malo o loo faagasolo pea ina ia mautinoa le lelei pea o auala tetele ma auala galue mo femalagaina i galuega, aoga, falemai, faatoaga ma o le ala foi lea o le iai o lo outou afioaga i le faasoa a le Malo.

E le po se silafia o loo feagai le lalolagi ma le faamai o le koviti, peitai e le o taofia ai galuega ua uma ona fuafua e le Malo ina ia faigofie femalagaina i auala tetele aua le soifua manuia o tatou tagata, ma o le a vave ai foi ona siitia atinae tau tamaoaiga e le gata i le laueleele faapea le gataifale. E maualuga le taofi olea aoga lenei auala mo le fesootai atu i faatoaga ma atinae lafu manu a le tatou nuu nei ma o le tou sao foi lea i le tamaoaiga o le atunuu, faapea foi ma le faafaigofie mo fanau i le agai atu i aoga, aemaise pe a oo ina lofia i tatou i mala faanatura pei o Tsunami ma mafuie ao lea ua lelei ma mautu le auala mo le agai atu i laueleele maualuluga mo le saogalemu.

O lea ua ma’ea le galuega pei ona outou talosaga mai ai ma sa tuitui mai ai le tou faipule, ao lafo sa outou ma’a aua le saga teuteu ma faaleleia atili le auala i taimi uma ina ia umi lona lelei.

E fia momoli atu ai pea le faafetai i le Konekarate a le Webster Works mo lenei galuega tele sa feagai ai, e le faaitiitia foi le agaga faafetai o le malo i lo tatou nuu nei i lo outou lagolago ao faagasolo le tatou galuega.

Momoli foi le faafetai i le Minisita o Galuega ma Atinae Tetele, Komiti Faatonu ma le Pulega o Felauaiga i le Laueleele mo le vaaia ma mata’itu lelei o galuega i ona vaega uma faapea Matagaluega a le Malo ma faalapotopotoga uma sa fesoasoani i lenei galuega.

Faamomoe pea i le mana o le Alii e tali mai ia tatou talosaga mo fuafuaga uma.

Manuia lenei aso i le alofa o le Atua. Soifua.

October 16, 2020