SAMOA, July 1 - PALOTA LA’ITITI MO GAGAIFOMAUGA #3

Tusia: Tusiga Taofiga

Ua tapena le Ofisa o le Komisi o Faiga Palota (OEC), e fa’amalieina tu’utu’uga o le Tulafono o Faiga Palota, e tusa ai ma le fa’ataunu’uina o le Faiga Palota la’ititi (by – election) mo le Itumalo o Gagaifomauga Numera 3. O lenei fuafuaga na fa’amanino e le Komesina o Faiga Palota, Faimalomatumua Mathew Lemisio, e mulimulitu’i lava le Ofisa e tusa ai ma aiaiga o le Tulafono peita’i o le fa’amavae ai o La’auli mai le tofi o lea Itumalo, ua avanoa ai le nofoa o le tofi faipule o Gagaifomauga Numera 3. Fa’ailoa e Faimalomatumua se’i tu’uina mai le warrant mai le Fofoga Fetalai, e fa’ailoa ai le taliaina o le fa’amavaega tusitusia a le Sui Faipule, ona fa’atoā fa’asalalauina fa’alaua’itele fo’i lea o le Poloa’iga mai le Ofisa o Faiga Palota, e fa’ailoa ai le aso ma le masina e fa’ataunu’u ai lenei Palota la’i’iti’iti mo lea Itumalo.

Sa fa’ailoa fo’i e le Komesina o Faiga Palota,, i lalo o le Tulafono o lo’o mafai pea ona fa’ataunu’u le Palota la’ititi mo lea Itumalo, ona o lea fa’atoa 9 masina a’o lumana’i ai le Palota tele a Samoa, se’i vagana ua toe 6 masina a’o lumana’i le Palota tele, ona lē mafai lea ona toe faia se faiga Palota la’ititi e tusa ai ma aiaiga o le Fa’avae ma le Tulafono. I le fa’amavae ai o La’aulialemalietoa mai lona tofi Faipule, ina ua mae’a folasia i le laulauafono a le Fono Aoao Faitulafono a Samoa – Palemene, le i’uga o le lipoti fa’apitoa mai le Komiti Fa’apalemene o Amioga Taualoa a le Fono Aoao, na sa’ili ai le amiotonu o saunoaga a le Sui Faipule aga’i i le tau o le afi ‘eletise ua fuafuaina mo le Falepuipui i Tanumalala.

E le’i sa’a usi felafolafoa’iga o finagalo o Sui Faipule o le Palemene aga’i i lenei lipoti, ae ua tula’i La’auli ma fa’ailoa lana fa’atoesega i le Mamalu o le Fono Usu a Samoa, e tusa ai ma ana lafoga sa sausaunoa ai i le Aso 24 – 27 o Ianuari 2020, e uiga i lea lava mataupu, ma ua ia ta’utino ai, e lē fa’avāea ana lafoga e tusa ai ma lana afi ‘eletise sa ia fa’amanino e ola ai lona Itumalo ae sili ona taugofie, fa’atusatusa i le taugatā o le afi ‘eletise fa’aleoleo o le a fa’atauina mo le falepuipui i Tanumalala. “O sa’u upu po’o sa’u tala sa fai i le Palemene lenei, ua ou fa’ato’ese atu, ma ou te fa’aālia manino ai i lenei aso ma le fa’afofoga a Samoa, Lau Afioga i le Fofoga Fetalai, ou te tu’uina atu ai la’u fa’amavaega aloaia i le Palemene o Samoa.”

“O le asō ua ou fa’amavae aloaia atu ai i le Palemene, ma ua ou fa’amavae ona o le mataupu lenei.” Ae i le fautuaga mai le Komiti Fa’apalemene mo Amio Taualoa a le Fono Usu a Samoa, na manino ai le tatau ai ona tu’uina atu o se fa’asalaga ia La’aulialemalietoa mo le 3 masina e fa’amalōlo lē tumau ai mai le tofi faipule o le Itumalo, fa’atasi ai ma le taofia o ana ona totogi ma fa’amanuiaga patino i so’o se Faipule i le umi e 3 fo’i masina.

Na toe tali fuaitau le Palemia ma ia fa’ailoa manino ai, e le’o se isi itu na afua ai ona tulituliaupū lenei mataupu, peita’i o le manumanu ma le popo’e ina ne’i mamulu le mamalu ma le aloaia o upu fai o le Malo, i ona ta’ita’i tauala mai i le Palemene, o le afuaaga lea sa fa’aauau lenei mataupu ina ia manino ma malamalama le ato’aga o tu’ua’iga ma saunoaga ia fa’amaonia auā le lumana’i o upu fai a le Malo Tuto’atasi o Samoa mo fanau faimai. Fa’ailoa e le Komesina o Faiga Palota, ua lava tapena le latou Ofisa e fa’ataunu’u se faiga Palota la’ititi pe a taulimaina le warrant mai i le Fofoga Fetalai o le Fono Aoao Faitulafono a Samoa.

July 3, 2020