Fa’asilasilaga Fa’alaua’itele a le Matagaluega o le Soifua Maloloina
SAMOA, March 22 - Talu ai le fa’amalosia ma le lagolagoina o le Poloaiga o Fa’alavelave Fa’afuase’i ma Matuiā o le Malo o Samoa mo Puipuiga o le fa’ama’i o le Korona-19, e talosagaina ai le mamalu o le atunu’u e autova’a mai le falema’i tutotonu i Moto’otua ina ia utagia mai vaega nei;
1. Mo gasegase tausavali uma (General Outpatients), fa’amolemole e fautuaina le VILI MAI E FA’ATULAGA TAIMI MA ASO e vaaia ai se foma’i ina ia aua ne’i umi ona fa’atali;
2. E fa’apena fo’i i auaunaga fa’apitoa uma, e pei o le siakiina o le; toto maualuga, suka, vaaiga o mata, taliga fa’apea ma le pa’u, ma’i tipitipi, va’aiga o tina/tama’ita’i to, tui puipui ma le siakiina o fanau laiti e fautuaina le VILI MAI E FA’ATULAGA TAIMI MA ASO mo a outou siaki, o talavai, ma nisi fautuaga.
3. Fa’amolemole fa’aaoga numera o le a ta’ua i lalo mo nei auaunaga – ina ia fetu’una’i ai le fa’asoasoaina o taimi ma aso e vaaia ai gasegase e autova’a mai.
Feso’otai mai le MOH Call Centre i numera o lo’o ta’ua i lalo; Numera e Vili Fua (Toll Free #) – 800 6440 fa’apea ma isi numera o lo’o taua; 21173; 21176; 21188; 21183; 24402; 22914
4. Mo le fa’aauauina o tui puipui o le fanau laiti e talosagaina le fa’aaoga o le Ofisa o le Soifua Maloloina i Matagialalua fa’apea ma falema’i fa’a itumalo.
5. Mo gasegase tigaina e aofia ai ni manu’aga, ma nisi o gasegase fa’afuase’i, feso’ota’i a’e ma susū sa’o ane i le vaega o gasegase tigaina, o lo’o tatala i so’o se taimi o le aso.
6. E to’atasi le tagata tausima’i po’o se tagata e fesoasoani ia te oe e fa’atagaina i totonu o le falema’i.
Ua faia lenei fa’atinoga ina ia fa’aititia le ono pipisi o fa’ama’i ma le malupuipuia o tagata uma e autova’a mai le falema’i. E tatalo atu fo’i i le mamalu o le atunu’u, ina ia mata’ituina lelei lou soifua maloloina i le fale e ala i le fa’atinoina o tu ma aga fa’asoifua maloloina masani, e pei o le fa’aauauina o le taumafa tatau, fa’amalositino, atoa ai ma inumaga o fualaau mo ē o lo’o iai gasegase tumau, tausisia o le tumamā lautele ma ia taumamao mai vaega o lo’o tumutumu ai tagata. O le a amata lenei faiga lē tumau i le Aso Gafua, 23 Mati 2020.
E le a’oaia e le matapia le manaia, ae fa’aoloolomaa’u i la outou fa’autaga malamalama ina ia māmā ai se tatou galuega fai fa’atasi.
Faia ma le ava tele, Leausa Samau Dr Take Naseri Fa’atonu Sili Aoao – Soifua Maloloina
Public Health, Ministry of Health Samoa Disaster Management Office – Samoa
Legal Disclaimer:
EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.
