SAMOA, August 26 - Lau Sususga ile Ta’ita’i o le Sauniga, Rev Vavatau Taufao, Lau Afioga ile Amepasa o le Malo o Saina i Samoa Chao Xiaoliang, Afioga i Minisitā o le Kapeneta, Sui Mamalu o le Palemene o Samoa, Sui o Mālō mai i Fafo, ae tainane le pa’ia ma le mamalu o le au valaaulia ua aofaga  potopoto mai. Talofa, mālō le soifua ma le lagi e mamā.

O le lagona o le fiafia ma le faagaeetia ua oo mai ia te a’u ina ua mafai ona tatou aulia mai lenei aso sa taupōina, ua tatala aloaia ai se tasi o galuega tele sa feagai ma le tatou Mālō. Ole Malae o Matagialalua o se tasi lea o atina’e o loo i totonu o le tatou atinae tele o le toe faaleleia lea ma faamatagofie o le Talafatai o le taulaga o Apia (“Apia Waterfront Project”) lea na amatalia ile tausaga e 2016. Ole tatalaina fo’i la o lenei Malae, o se tasi lea o vaega tāūa o le Polokalame o le faamanatuina o le 60 tausaga talu ona tuto’atasi lo tatou Mālō.

O le sini ma le faamoemoe o le galuega atiae o le Talafatai o le Taulaga o Apia; ia faaleleia ma faamatagofie nofoaga faitele e amata mai i Taumeasina se’i pā’ia le penisula i Mulinuu. O le faanaunauga o le tatou Mālō, ia tele ni nofoaga paganoa i le taulaga e feiloa’i ma tafafao ai o tatou tagata, ae le gata i lenā o ni avanoa e faatau ai ni oloa pe fai ai fo’i ni faafiafiaga. O lenei atina’e o le a le gata ina aogā mo le tatou atunuu ae faapena fo’i ona faatōsina mai ai tagata tafafao maimoa mai fafo ma toe faaolaola ai nei atinae talu aafiaga o le faamai.

O le a avea lenei nofoaga e saga faamausaliina ai mafutaga faaleaiga ise siosiomaga fiafia ma le matagofie.  Ou te talitonu ua talafeagai tele le tatalaina o lenei atinae tāua e faaopoopo ile polokalame mo le faamanatuina o le Tutoatasi ae maise ai o le toe tatalaina o tatou tuaoi mo femālaga’iga. Ua o gatasi foi lenei galuega ma vaega ua mae’a i lumāmaota o le Maota o le Malo lea na faatupeina e Niu Sila.

O lenei galuega sa faatupeina lea e le Mālō o Saina ise faiga paaga ma le Aai o Huizhou ile itumalo o Guangdong. O le tausaga e 2018 na sainia ai se feagaiga ile va o tatou mālō e lua, ina ia faaopoopo lenei malae ile tatou galuega tele o le Talafātai o le Taulaga. O aafiaga o le faamai na mafua ai ona faatuatuai le faatinoga o nisi vaega o lenei atinae. Peitai o lea ua pine mai i le asō lenei taunuuga matagofie.

O lenei malae, e 6 ni vaega ua vaevaeina iai

1. O se nofoaga mo koneseti ma faafiafiaga
2. O se nofoaga mo le fanau iti e taaalo ma tafafao ai
3. O se togālaau felanulanua’i ma se auala laupapa mo i latou e fiafia e maimoa ile matagofie o le siosiomaga
4. O se nofoaga e fai ai taaloga ia poo ni faamalositino fo’i
5. O ni fale se 3 e avanoa ona fai ai ni fale’aiga ia poo ni faleoloa lē tumau
6. O se nofoaga e fesootai uma ai isi vaega o le Malae e mafai ona feafifio a’i ai le atunuu ma feiloa’i ai

Ou te manatu, o lea ua sili ‘ofe nei tautai o le fua, o lea ua mae’a le galuega sa feagai ma tatou. Avea ia o lenei avanoa e momoli atu ai le faafetai tele i le Mālō o Saina e ala atu i lau afioga ile Alii Amepasa Chao Xiaoliang mo le faatupeina o lenei galuega. Faafetai atu fo’i ile Kamupani ale Shanghai Construction Group mo le fausiaina o le galuega. E lē gata i lea o le faafetai faapitoa i lau Afioga ile Minisita o Galuega, Felauaiga ma Atina’e tetele mo le sao o lau Vaega Tuma’oti (Sector) ile galuega. Mālō le tauata’i mālō le galulue.

O la’u upu mulimuli, Lau Afioga ile Minisita o Tagata Tafafao Maimoa mai Fafo, o le asō e tuu aloa’ia atu ai lenei Malae matagofie i le vaavaaiga a lau afioga e ala lea ile Pulega o le Ofisa o Tagata Tafafao Maimoa mai Fafo. Sagai ane la ia ‘ai o le tai, ina ia manuia tele le feagai ai ma le faafoeina o lenei Malae matagofie.

Soifua ma ia Manuia

Legal Disclaimer:

EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.