SAMOA, July 7 - FESILIGIA LE FA’AMAONI O LE SUI FAIPULE O SALEGA

Tusia: Tusiga Taofiga

E ono fa’atu se lafo i luma o le laulauafono a le Palemene e ono su’esu’eina ai le fa’amaoni o lafoga fa’alaua’itele a le Sui Faipule o Salega, Olo Fiti Vaai ua fa’asalalauina i luga o upega tafa’ilagi, leitio ma televise e foliga mai ua ia fesiligia fa’ai’uga a le Fono Aoao Faitulafono, le Palememe o Samoa. O lenei taofi ua fa’aleoina e le Palemia, Tuilaepa Sailele Malielegaoi e fa’avaeina lea i mau a Olo sa fa’asalalauina i le fa’ai’uga o le vaiaso ua mavae, na ia tu’ua’ia ai le Palemene i lana fa’ai’uga i le mataupu sa su’esu’eina ai le Sui Faipule o Gagaifomauga #3, La’aulialemalietoa Leuatea Polataivao Schmidt.

E le gata i lea, a’o se tasi fo’i o atulagaluga a le Palemia e pei ona ia fa’aleoina e auala mai i lana polokalame ma le Leitio a le 2AP, e le fou nei tu’ua’iga pepelo a Olo o lo’o mele ai atinae ua tino mai a le malo i lalo o le fa’amalumaluga a le Vaega Fa’aupfai e Puipuia Aiā Tatau a Tagata (HRPP.).

Saunoa Tuilaepa e fa’apea; “O le tulaga lena lea ou te popole ai ma e lē toe i ai se isi taimi e tu’ufau ai mea ia, leaga o le taimi nei, ia fa’a’ete’ete lava le Malo, i le so’ona tu’ufau o amioga ma fa’amatalaga lē fa’avāea e tupu ai le vevesi o le atunuu. Fa’ailoa e Tuilaepa, e tatau ona fa’asa’o lafoga nei, o lo’o fa’asalalauina i le atunuu, ona o le naunauta’iga ia ‘aua ne’i tāina sesē le atunuu i fa’amatalaga tau fa’a’ole’ole o lo’o agina i le ea i so’o se ala fa’asalalau o faia ai nei polokalame.

“Na fai nei le aso fono mulimuli a le Palemene, ae alu atu le sui (Faipule o Salega) fai fa’aleo tele lava lana tala pei o se tala ula fo’i lea, se ua ta fiu se e pepelo, ae maua a a’u, ta te tu atu e taumafai e fa’asesē le saunoaga a le Palemia, ae fai a ma maua a’u, a’o lea e fai lana ta’utinoga ii ma ata. “A’o lea fo’i ou te fa’alogo atu, o lea e faufau isi ana fa’amatalaga e pei e ta’u māmaina ai le galuega a le Palemene, o mea a nei, e ono tagofia e le Palemene o lumana’i nei, se Sui a Faipule na te ta’uvaleaina le Palemene o Samoa.

“Aemaise a le Sui lea o Salega, ua tele taimi na te aumaia ai fa’amatalaga e pei e foliga mai, o lea e i ai se faufauga o lo’o fai, a’o lea e maua mai lava e le Palemene, e fetaa’i lava matou i totonu, ona o taimi e le milia fa’au’u upu o le fono. “Ae ua faiso’o a e le Sui lea, lea ou te mātauina, lea fo’i na saunoa i isi ana lafoga ia sa fa’alele nei, e leai ni fa’amanuiaga o aumai mai le Atua mo Samoa, aisea, leaga o lea e tapua’i ia Pa’ala, le Sui Faipule a lea o Salega.

“Lea fo’i na ou tali manino i ai i totonu o le Palemene, e leai se tagata fa’apea o tapua’i ia Pa’ala o o’u iloa e a’u, o lea ou te māta’itu lelei lava uiga nei, se mo le Faipule o la e manino Tulafono tumau na te ta’uvalea le Palemene ma ‘ave ni fa’asilasilaga fa’alaua’itele e fa’asesē ai le atunuu. “O la e maua uma lava fa’amaumauga, ma e avane uma lava i le Palemene vaega nei, ua tatau fo’i ona la’a i ai le Palemene i le tulaga lea, mo le Faipule ua mimita tele, ma e lē vālea uma Faipule.

“Manatua o le lipoti lea, e le’o se mataupu na afua atu i le Palemene, o le mataupu na afua mai lava i le ta’utinoga na faia e le Sui Faipule o Gagaifomauga Numera 3, o lana lipoti i lana mau ma toe lagolago i ana lipoti tusitusia na aumai i totonu o le Palemene lea na afua ai le su’esu’ega lea sa fa’atino.

“Ma o se su’esu’ega na ou lagolago ai le mau a le Faipule o Gagaifomauga Numera 3, ona ou te vaai atu e naunau, e fa’asaoina seleni, le ala lena na ou lagolago ai, ae ou te mana’o ia malosi le mau e lagolagoina ai lana mau, ina ia amata ai loa ona liliu le Malo e matuā tagofia po’o ai le aufaigaluega na avatua lenei tapenaga fa’aletonu i totonu o le tala o le tupe.

“O le ala lena na fai ai le su’esu’ega, e le’i fiafia i le fa’ai’uga a le Komiti o Tupe, ae sa mana’o e tatau ona ‘ave i o, i le Komiti Fa’apalemene o Amioga Taualoa, ona ou toe talosaga fo’i lea, ma lo’u manatu ina ia fa’asa’o se tagata faigaluega a le Malo, ua sees, o lona uiga, o se agaga lelei, lea ou te lagolagoina le manatu lea e foliga mai o se agaga lelei, lea na aumai e le Sui o Gagaifomauga Numera 3, ae te’i ua aliali mai ai le telē o le fa’aletonu, ma aumai ai loa ma le latou fa’ai’uga e pepelo mea ia na aumai.

“A silasila mai la e le’o se mea na faufau e fa’aleaga ai se isi, o le mea e fa’amautu ai le mea lea e naunau mai ai La’auli, ona o lea fo’i ou te naunau i le mea lea e naunau mai ai le Sui o Gagaifomauga Numera 3. “Se o a’u ou te inoino tele e toe fo’i i tua, ua tigā fofoga o tagata, ou te augatā fo’i e toe tautala i nei mea, e le’o se mea na fa’atupu e se isi, o mea na fa’atupu lava e le Sui Faipule o Gagaifomauga lava ia, ae lagolago e le Sui Faipule o Salega. “Ma o lea ou te manatu, o le mea lea ua lavea ai le Sui Faipule o Gagagifomauga Numera 3, ona ua fa’alogo tele i una’iga leaga lea a le Sui o Salega.

“Ma o lea ou te tau fa’alogo atu, ua aga’i i le amiotonu o le Fofoga Fetalai ma le Palemene atoa, masalo e lē māma i le Palemene mea lea, lea e toe fono i le masina fou, ma o le a tagofia uma lava fa’asalalauga nei, ma o le a tagofia loa e le Palemene, ma ua ou manatu fo’i ua tatau ona faia le tulaga lena. “E lē avane lou naunau e fa’aleaga se mea, e nofo ai le Sui lea o Salega ma aumai mea le fetaui, auā o le fa’asologa lava o le polokalame, e le fa’apea o se mataupu e a’afia ai le fa’amasinoga, ‘ese mamao lava le fa’amasinoga.

“Ua leva ona fa’ata’oto mai polokalame nei a le Palemene, o le fa’amasinoga ia, e fai latou fa’ai’uga tolo, tolo, tolo, ua atoa le tausaga o tolo tolo, a’o le i’uga a le Palememe masalo e le’i atoa se ono masina talu ona faia le su’esu’ega lea fa’avae i luga o saunoaga a le Sui Faipule lea, ma lana fa’atupu manatu fa’atasi ai ma ana lipoti sa tu’uina mai i totonu o le Palemene lea na amata fa’ataunu’u ai loa le su’esu’ega lenei, ma lana fautuaga e ave i le Komiti Fa’apalemene o Amioga Taualoa, o lea la ua aumai le lipoti a le Komiti na mana’o e ‘ave i ai, lea ua aumai le lipoti a le Komiti na te talitonuina. “O lea ua avatu le i’uga o le lipoti a le Komiti sa talitonuina e La’auli, a’o lea ua faimai o mea na faufau, e le’i faufaua e se isi, na ‘ave mana’o i ai le Sui o Gagaifomauga Numera 3 e ‘ave i ai.

“O le ala lena e lē mafai ai ona ou tuua mea ia, leaga talu ona ou ola mai, fa’atoā ou tau lea i ni Sui ua matuā tala pepelo tele, se pepelo le fuafuaina o nei tagata se, ma o le ala lena ou te lē tuua ai fa’amatalaga nei, so’o se manatu lava e aumai e sesē ou te tu lava e fa’asa’o, auā a le fa’asā’oa mea ia, ona ‘ave ai lea i fa’amaumauga e sa’o mea ia e talanoa mai ai tagata nei, e o’o i talanoaga, i’uga a le Kapeneta sa saofa’i ai le sui a’o lea ua faimai na te le’i i ai.

“O le ala lena e lē mafai ai ona ou nofonofo, auā a ou lē fa’asā’oa mea nei, ona avea ai lea o mau lē sa’o o ni mau ua sa’o, ae ona ia fa’amautu le sesē o mea ia, ua aga’i ai lo’u mafaufau i le tulaga lena, ina ia fa’amautu le sesē o tu’ua’iga nei, o le taimi e toe fono ai, ou te ono tapā ai le avatu uma o ana saunoaga ia na fa’asau a le sui lea o Salega, e ono tagofia e le Palemene, leaga a le faia mea ia, e tamau i lalo, o se Palemene pi’opi’o.

“E le’o suia a le fa’agasologa mai le taimi o Nonu Malo, fa’asolo mai ia Afamasaga, soso’o mai ai ma Leaupepe, soso’o mai ai ma La’auli lea ua toe tofia ai Leaupepe, o lea lava e sosolo lava i luga o Tulafono tumau, ma e na’o le tasi lava le tagata na te fa’auigaina Tulafono tumau nei e avea fo’i ma ana Tusi Paia, o le Fofoga Fetalai. “O le Fofoga Fetalai lea e i ai nei, ua leva, pei lava o le pi tautau ia te ia, Tulafono tumau, e lē fa’apea na’o le tasi lau paea’iga ae ua e iloa uma ai Tulafono tumau, o i la e fa’ata’oto uma mai ai a, le fa’agasologa o le fa’ata’atiaga o polokalame o le fono.

“Manatua fo’i, e amata loa le fonotaga ona tapā lea o a’u (Palemia) ou te fa’atu le lafo mo le fa’aauauina o nisi o lipoti e le’i mae’a ona lotea e le Komiti, vagana lipoti ua mae’a iloiloina, ona fa’atulaga loa lea mo le fa’agasologa o le fono, e ave la le fa’amuamua i mataupu a le Malo, i Tulafono a le Malo, e i ai le Tala o le Tupe, a uma loa, ona fa’asolo loa lea o mataupu a Komiti o le Palemene, o mea la lena e feso’ota’i sa’o lava le Failautusi o le Ofisa o le Fono Aoao Faitulafono a Samoa ma Komiti ta’itasi nei, ina ia fofoga le Fono i le aotelega o lipoti nei, ma fa’ata’atia ai loa le fa’agasologa o le fono.

“E le’i lava le polokalame lena, ae ua ou fa’alogo i nisi o manatu lē fa’avāea i le mea lea na tupu nei, ina ua uma mataupu a le Malo ina ua pasi le Tala o le Tupe, o le isi loa la’asaga o le fa’atuua loa o le fonotaga, ae logo mai loa e le Komiti Fa’apalemene o Amioga Taualoa, o lea ua uma le latou soālaupulega ma ua mae’a iloiloina fo’i fa’amaumauga uma o le lipoti ma ua o’o i le taimi ua tatau ona folasia ai i totonu o le Palemene. “Manatua fo’i, o i e iloa ai le Komiti o lo’o fa’atino lelei a latou galuega ma mata’ālia, vave ona tagofia mataupu nei ma vave fa’asolo mai i totonu o le Palemene, ma fa’agasolo loa mataupu o le fono. “O le Sui Faipule la e nofo ma fai se fa’asalalauga o lo’o i ai se tulaga solitulafono, ou te ono fa’atuina le lafo e su’esu’e ai le amio a le sui lea, se sui e ono ta’uvalea ai le Palemene, aemaise e i ai le Sui ua faiso’o a lana mataupu lea.

July 16, 2020