SAMOA, July 3 - • O loo ua tini pa’o nei le uto ae tau le ai pei o faiva o tapalega, ua maea foi ona mua mea i Matautu Sa, o le viiga lea i le Atua. Ia faamanuia le Alii i lana auauna maua pea le tumu atoatoa mai ia te ia aua le talaiina o lona finagalo.

• Ua maea foi ona paepae paia o lenei aso. O le a lē toe oo iai se faamatalaga auā e lē toe aloina faalua se ogasami e tasi, ae tau ina faatulou iai ma le faaaloalo. E ao foi ona faapa’i i paia i le afio o Alosina ma le fuaifale o Salevalasi, le Faletolu ma le Vainalelepa ma upu ia te oe Tuisamau.

• O le asō ma le auga o aute, lea ua tau lau o le faamoemoe, pei ona tatou molimauina le tatala aloaia o potu aoga fou e 6 mo le laumua nei.

• E momoli ai le faamālō ma le faafetai i le fesoasoani mai o tatou paaga ma mālō mai fafo pei o le malo o Iapani. Faafetai i lau afioga i le alii Amepasa ma le malo o Iapani mo lenei galuega taua ma le aoga mo le kolisi o Leififi. Faafetai foi i le lagolago malosi a le Komiti Aoga ma le PTA ua iloga lo outou sao taua i galuega fai a le laumua mo le manuia o tou alo ma tatou fanau.

• Tasi lenei o kolisi oloo faatupulaia pea le faitau aofai o fanau aoga oloo aoaoina ai faapea foi le aufaigaluega galulue pei ona matauina mai tausaga ua tea.

O le ata manino lea o le alualu i luma o taumafaiga a tama ma teine o Leififi ona o le lagolago a matua ma le komiti o aoga.

Tatou opogi le taumafai mai a le malo ma le matagaluega, ia unaia fanau e faaaoga le tele o polokalame fou ua i totonu o aoga.

O lenei talutalu fou ma auala faatekonolosi e aoaoaina ai fanau ia ia aua nei oge alagaoa ma fesoasoani. O se manaoga na moomoo ina ia tupu, a o lea ua molimauina i polokalame faasolo a le matagaluega i vaiaso taitasi a o iai lo tatou atunuu i puipuiga o faamai.

• Lau tōfā i le matua o faiva ma le falefa o lo outou aiga, faamālō galulue. Ia maua pea lo outou malosi e faaauau ai taleni mai i le Atua.

• Lau susuga a le tamaitai pule, le pule lua ma faiaoga, faamalo galulue. O le fautuaga, ia tumau i le faamaoni e faatino lo outou valaauina. O loo gasolo mai pea alo ma fanau, o pine faamau ia o lo outou soifua tautua mo Samoa ma le lumanai.

• E toe faafetaia a tatou paaga mo le fesoasoani mai. Ia alofa le Atua ma faamanuia.

• A tuuama le fua ma tatala le filialii, ia faapaolo mai aao o lo tatou matai sili. SOIFUA.

July 3, 2020