SAMOA, March 30 - Talu mai le aso 30 o Mati 2020 i le 1 le afiafi, e LEAI SE TASI UA FAAMAONIA e le Matagaluega o le Soifua Maloloina ua maua i le faama’i o le Korona-19. O lo o fa’aauauina pea auaunaga a le Matagaluega mo e o lo o manaomia. Ua tapena foi le Matagaluega mo ni gasegase pea o’o mai lenei faama’i.

I le taimi nei, i le itula e 1 i le afiafi, aso 30 o Mati 2020:

1) E 26 tagata na faia ai su’esu’ega faapitoa mo le fa’amaoniga o lenei faama’i o le Korona-19 2) Mai nei su’esu’ega faapitoa e 26, e to’asefuluono (20) tagata e le o fa’amaonia o a’afia i le faama’i ae to’aono (6) o loo talia pea i’uga o su’esu’ega.

I le taimi nei, e to’atasi le gasegase o lo’o I lalo o le va’ava’aiga a foma’i i le Maota Gasegase TTM i Moto’otua.

O nei su’esu’ega na fa’atino uma mo i latou na iai āuga e pei o le fiva, o āuga o le fūlū ma sa malaga i totonu o le sefulufa (14) aso talu ai i atunu’u mamao. O lo’o mata’itu lelei a tatou fa’amaumauga tau le soifua maloloina ina ia vave ona fa’atino su’esu’ega maumaututu mo le fa’ama’i o le Korona-19. O le a fai ma fa’ailoa i le mamalu o le atunu’u, le aofa’i o i latou ua a’afia i āuga, ma mana’omia ona lafo a latou su’esu’ega ina ia fa’amautu mai Niu Sila.

E fautuaina ma le malosi tagata uma o lo’o faimalaga ma afea atunu’u o lo’o a’afia i le fa’amai o le Korona-19, ina ia mata’ituina lelei lo latou soifua maloloina pe a alia’e āuga nei; fiva, tale ma faigata ona manava. Afai ae alia’e nei āuga, fa’amolemole fa’afeso’ota’i mai le Matagaluega o le Soifua Maloloina po’o se foma’i mo se fautuaga.

E fautuaina fo’i, fa’amolemole ina ia mata’itu lelei lou soifua maloloina ma ia mautinoa lou nofo lelei i le fale pe a o’o ina alia’e nei āuga. Ia iai se potu e te nofo ese ai po’o se vaega fa’apitoa o le fale, mai lou aiga ma ia mautinoa e aua ne’i fa’aaoga fa’atasi vaega e aai, feinu ma momoe ai.

O lo’o galulue le Matagaluega o le Soifua Maloloina ina ia si’itia puipuiga, ma ia taofiofi le ono pipisi o le Korona-19, e aofia ai ma tapenapenaga o falema’i ta’itasi. E tāua fo’i le lagolago a le mamalu o le atunu’u auā le puipuiga o Samoa.

So’o se tagata e mafai ona a’afia, aemaise lava i latou ua 60 aga’i luga le matutua fa’apea ma ē o lo o iai ni gasegase tumau po’o nisi e le o ato’atoa lelei le malosi o le tino. E taua le lagolago e ala i le puipui o oe, ina ia puipui ai nisi tagata.

1. Ia fufulu mamā lima i taimi uma i se fasimoli ma vai mamā po’o se vailaau fufulu lima. 2. Ia pupuni lou fofoga pe a mafatua pe tale i se pepa solo mama; tia’i vave i le lapisi pe a uma ona fa’aaoga ma fufulu mamā lima pe a mae’a. 3. Ia fa’aaoga le tali fofoga pe a fa’apea o e gasegase po’o se tagata o lo’o tausia le tagata ua gasegase i totonu o le falema’i. 4. Aua le tago so’o i ou fofoga (mata, isu, gutu) 5. Vili se foma’i po’o se falema’i lata ane mo se fautuaga pe a ua alia’e ni āuga. 6. Fautuaina e taofi ni faigamalaga o lo’o fuafuaina. 7. Fautuaina e taofia le auai i vaega o lo’o tumutumu ai tagata ma ia 1 le mita le mamao ma le isi tagata o lo’o a’afia i āuga o le fulu. 8. Ia fa’amamā i taimi uma vaega ma mea totino e tagofia so’o e pei o; au o faitoto’a, luga o laulau/kesi, telefoni) 9. Fautuaina le taofia o ni asiga ma le tumutumu i falema’i aemaise i le fanau i lalo ifo o le 19 le matutua; na’o le to’atasi le tagata fa’atagaina e tausi ma’i.

Mo nisi fa’amatalaga ma fautuaga fa’apea ma femalagaiga, fa’amolemole silasila i upegatafa’ilagi ma numera o lo’o ta’ua i lalo.

FACEBOOK: Government of Samoa | Public Health, Ministry of Health Samoa

WEBSITE: www.samoagovt.ws | www.health.gov.ws

NUMBERA VILI FUA: 800-6440