There were 434 press releases posted in the last 24 hours and 166,605 in the last 365 days.

TEUTEUGA O LE POLOAIGA O FAALAVELAVE FA’AFUASE’I MO LE CORONAVIRUS, (KOVITI-19) – 26 Mati 2020

SAMOA, March 26 - (OSIFA OLE SO’OUPU O LE MALO); Ua tuuina nei le malosiaga faaletulafono e mafai ai e malu ole malo ona molia ma taofia soo se tasi e le usitaia le Poloaiga o Faalavelave Faafuasei e pei ona faamaonia faaletulafono e le Ao Mamalu ole Malo, Tuimaleali’ifano Va’aletoa Sualauvi II ile afiafi nei.

O lea teuteuga ole Poloaiga ua faamaonia I luga ole fautuaga ale Kapeneta FK (20) Faapitoa 10, ma le Mataupu 106 o le Tulafono Fa’avae ma olo’o taua ai e faapea;

Pepa faailoa o le Solia o se Poloaiga Faalavelave Faafuasei (1) E mafai e Leoleo ona tuuina atu le Pepa Faailoa o le Solia o se Poloaiga i se soo tagata ua solia aiaiga o Poloaiga ua faataoto i totonu o Poloaiga mo Faalavelave Faafuasei. (2) O Pepa Faailoa i lalo o lenei Poloaiga e tatau ona faamaonia e le Komesina o Leoleo. (3) Soo se tagata ua tuuina atu i ai se Pepa Faailoa o le Solia o se Poloaiga, e ao ona ia totogi le sala tupe ua ta’ua i lea Pepa Faailoa, i totonu o le 24 itula talu ona tuuina atu iai le Pepa Faailoa.

Faasalaga (1) E solitulafono le tagata e lē usitaia Poloaiga uma ua taua i luga, ma o faasalaga nei: (a) sala tupe: (i) mo tagata ta’itoatasi, $200 mo le solitulafono muamua, ma le $500 i aso ta’itasi e faaauau ai lea solitulafono; ma (ii) mo faalapotopotoga faatulafono, $5,000 mo le solitulafono muamua, ma le $7,000 i aso ta’itasi e faaauau ai lea solitulafono; poo le (e) taofia i lalo o le vaaiga a Leoleo; poo le (i) taofia i lalo o le vaaiga a Leoleo ma le sala tupe i lalo o le parakalafa (a). (2) O le totogiina o se sala tupe atoa i lalo o lenei poloaiga, o le a lē molia ai se tagata i se faamasinoga o soligatulafono mo le faasalaga i lalo o le Pepa Faailoa o le Solia o se Poloaiga i lalo o le poloaiga 13. (3) A faamaonia le solitulafono o se tasi i lalo o nei poloaiga, e mafai ona faasala i se sala tupe e le sili atu i le $10,000 poo le fale puipui e le sili atu i le 12 masina, poo faasalaga uma e lua.

O se tasi foi o teuteuga ua faatulafonoina I lalo o lenei poloaiga “Ua tapu le toe ulufale mai o ni vaa fagota ma isi ituaiga vaa sei vagana vaa oloa ma vaa suauu, seia iai se taimi, ae ua faatonuina le Matagaluega o Soifua Maloloina ina ia matua faamalosia puipuiga mo tagata uma.”

O lenei Poloaiga ua amata faamamaluina i le aso 26 Mati 2020 ma ua toe lomia i lona atoaga mo le silafia ele atunuu;

1. Vaiaso Anapogi ma le Tatalo: Ia faamamaluina e aiga uma o Samoa, le vaiaso anapogi ma tatalo mai le Aso Sa 22 Mati 2020 i le Aso Sa 29 Mati 2020, mai le 6.00 i le taeao seia aulia le 12.00 i le aoauli.

2. Femalagaiga Faavaomalo vaalele ma vaa a lalo: (1) Sei vagana ni tulaga faanatinati e tatau ai ona fa’atino i luga o le Faamaoniaga a le Kapeneta, e tapunia femalagaiga faavaomalo i vaalele e amata faamamaluina i le 12.00 i le taeao o le Aso Tofi 26 Mati 2020. (2) Ua tapu le toe ulufale mai o ni vaa fagota ma isi ituaiga vaa sei vagana vaa oloa ma vaa suauu, seia iai se taimi, ae ua faatonuina le Matagaluega o Soifua Maloloina ina ia matua faamalosia puipuiga mo tagata uma.

3. Potopotoga i nofoaga faitele: (1) Ua tapu nei ona toe faia ni potopotoga i nofoaga faitele uma e oo atu ile lima (5) tagata. (2) O potopotoga i nofooaga faitele e aofia ai tapuaiga, maliu, umusaga, taaloga faitupe, aso fanau, reunion ma isi potopotoga uma. (3) Ua tapu nei ona toe tatala ni fale kalapu, faletifaga ma falepia, e aofia ai ma pa pia i totonu o faleaiga ma fale talimalo, ma soo se ituaiga faafiafiaga uma e ono tumutumu iai tagata. (4) Ua tapu nei ona toe tumutumu tagata i nofoaga o femalagaiga e pei o malaevaalele ma uafu, se’i vaganā o tagata e malaga. (5) Ua tapu nei ona toe tatala fale’aiga mo taumafutaga a tagata i totonu o faleaiga, ae faamalosia le oka ma faatau o meataumafa e taumafa ile fale.

4. Femalagaiga faalotoifale: Taavale laupasese (1) Ua tapu le toe faaaogaina o pasi la’u papsese, ma taavale la’u pasese e sili atu ma le lima (5) tagata e faaogaina. (2) E faataga le faaaogaina o taavale la’u pasese laiti, e i lalo o le lima (5) pasese, ma taavale a aiga pe a moomia. Vaa (3) E amata faamamaluina ile 12.00 i le taeao o le Aso Tofi 26 Mati 2020 le tapunia o alavaa mo le femalagaiga a tagata lautele ile va Savaii ma Upolu, sei vagana ai tagata malaga o auaunaga o oloa feaveai ma auaunaga a le Malo e moomia mo Savaii e faaauau pea ona faaaogaina ai vaa. i aso o lo o ta’ua i lalo.

5. Maketi ma Faleoloa Supamaketi: (1) O maketi uma e aofia ai maketi i Savalalo, Fugalei, Salelologa, Vaitele ma isi maketi: (a) e faatapulaa itula e tatala ai mai le 6.00 i le taeao i le 4.00 ile afiafi seia iai se isi faaliga; ma (e) ua tapu ona toe momoe ai nisi i nei nofoaga ile po seia iai se isi faaliga. (2) Ua faatapulaa nei itula e tatala ai supamaketi mai le 6.00 i le taeao i le 4.00 ile afiafi.

6. Faatau oloa i magaala ma tafaala: (1) Ua tapu nei ona toe fa’atau ni oloa i magaala ma tafaala ole taulaga i Apia, Vaitele ma Salelologa. (2) Ua matuā tapu ona toe faatau savali e tamaiti ni oloa i soo se taimi.

7. Aoga: (1) Ia tapunia uma aoga i Samoa, seia toe iai se isi fa’aliga.

8. Falema’i, ma’i, tausima’i ma siigama’i : (1) Ia faaitiitia le soona feoai, ae maise i latou ua 60 tausaga ma sili atu le matutua, se’i vagana ua mātuā moomia ona vaai se fomai. (2) Ua matua tapu ona toe ulufale se tagata i soo se falema’i sei vaganā ai, ua moomia ona vaai se foma’i. (3) Mo le tagata ua taofia: (a) ua nā o le tasi le tagata tausima’i e faataga; ma (e) e nā o le toalua (2) tagata e faataga mo asiga. (4) Ua taofia ona toe auina atu i Niu Sila o gasegase mo togafitiga i lalo o le Polokalame masani le Malo, seia toe iai se isi faaliga.

9. Aiaiga mo galuega a le Malo: (1) Ia faatino e le Komisi o Galuega a le Aufaigaluega a le Malo, (“Komisi”) ni aiaiga e alagatatau ona faatino mo tagata faigaluega a le Malo, e faitiitia ai le ono pipisi o le fa’ama’i e pei o le galulue mai i le fale e faaaoga ai initaneti. (2) O aiaiga e faataatia e le Komisi, e aiaia uma ai Ofisa ma Matagaluega a le Malo. (3) Ua taofia uma malaga faalemalo i atunuu i fafo seia toe iai se isi faaliga.

10. Tiute o le Matagaluega o Soifua Maloloina: Ia faatinoina e le Matagaluega o Soifua Maloloina le unaia o polokalame falauiloa o le puipuiga o le pipisi o le fa’ama’i o le Korona Vairasi 19, mo le nofo silafia o le atunu’u.

11. Malosia’ga o le Matagaluega o Leoleo: Ua tuuina atu ile Matagaluega o Leoleo le malosiaga e faatino ai le mata’ituina o lenei Poloaiga.

12. Malosiaga faapitoa o faauluuluga o Matagaluega: Ua tuuina atu le malosiaga i faauluuluga o Matagaluega ma Ofisa uma o le Malo, o loo iai ā latou malosiaga fa’aletulafono e faatino a latou malosiaga faaletulafono, faapea ai, le malosaga o faauluuluga e faatino le Fuafuaga Mamao a le Malo ile tali atu i le Korona Vairasi 19.

13. Pepa faailoa o le Solia o se Poloaiga Faalavelave Faafuasei (1) E mafai e Leoleo ona tuuina atu le Pepa Faailoa o le Solia o se Poloaiga i se soo tagata ua solia aiaiga o Poloaiga ua faataoto i totonu o Poloaiga mo Faalavelave Faafuasei. (2) O Pepa Faailoa i lalo o lenei Poloaiga e tatau ona faamaonia e le Komesina o Leoleo. (3) Soo se tagata ua tuuina atu i ai se Pepa Faailoa o le Solia o se Poloaiga, e ao ona ia totogi le sala tupe ua ta’ua i lea Pepa Faailoa, i totonu o le 24 itula talu ona tuuina atu iai le Pepa Faailoa.

14. Faasalaga (1) E solitulafono le tagata e lē usitaia Poloaiga uma ua taua i luga, ma o faasalaga nei: (a) sala tupe: (i) mo tagata ta’itoatasi, $200 mo le solitulafono muamua, ma le $500 i aso ta’itasi e faaauau ai lea solitulafono; ma (ii) mo faalapotopotoga faatulafono, $5,000 mo le solitulafono muamua, ma le $7,000 i aso ta’itasi e faaauau ai lea solitulafono; poo le (e) taofia i lalo o le vaaiga a Leoleo; poo le (i) taofia i lalo o le vaaiga a Leoleo ma le sala tupe i lalo o le parakalafa (a). (2) O le totogiina o se sala tupe atoa i lalo o lenei poloaiga, o le a lē molia ai se tagata i se faamasinoga o soligatulafono mo le faasalaga i lalo o le Pepa Faailoa o le Solia o se Poloaiga i lalo o le poloaiga 13. (3) A faamaonia le solitulafono o se tasi i lalo o nei poloaiga, e mafai ona faasala i se sala tupe e le sili atu i le $10,000 poo le fale puipui e le sili atu i le 12 masina, poo faasalaga uma e lua.

15. Faatupeina: O le faatupeina o fuafuaga a le Malo i lalo o lenei Poloaiga e faatupeina mai vaegatupe talafeagai a le Malo.

Ua soloia le Poloaiga Faalavelave Faafuase’i Numera 3 o le aso 24 Mati 2020.

Distribution channels:


EIN Presswire does not exercise editorial control over third-party content provided, uploaded, published, or distributed by users of EIN Presswire. We are a distributor, not a publisher, of 3rd party content. Such content may contain the views, opinions, statements, offers, and other material of the respective users, suppliers, participants, or authors.